‘Ngafunga ngemfundo yamahhala’
GATHATHA isifungo sokuthi uma ngisekuhulumeni ngeke ngiphume imfundo ingabanga mahhala, noma bangangigxeka noma bangathini.”
Lokhu kushiwo ngobengumengameli wezwe, uMnuz Jacob Zuma ekhuluma ngokuthi wafunga ukuthi imfundo uzoyenza ibe mahhala.
UZuma, obekhuluma emcimbini wokuhalalisela abafundi abenze kahle esikoleni iBizimali High eNkandla, uthe imfundo yinto ebaluleke ukuzedlula zonke.
“Uma sifundisa abantwana bethu sisuke sakha ikusasa labo. Imfundo isemqulwini wenkululeko ngakho kumele ibe mahhala. Kumele ibe mahhala bese iba yimpoqo,” kusho uZuma eshayelwa ihlombe.
UZuma ugxekiwe ememezela ukuthi zizofunda mahhala kulo nyaka izitshudeni ezenza unyaka wokuqala abazali bazo abahola ngaphansi kukaR350 000 ngonyaka.
Wagxekwa ngokuthi wamemezela lokhu engazange axhumane nezinhlaka ezehlukene okubalwa noMgcinimafa okunguye owaba imali. Kulo nyaka le mfundo yabelwe ngaphezulu kukaR12 billion kanti eminyakeni emithathu ezayo yabelwe uR57 billion.
UZuma uthe njengoba imfundo isimahhala ukuba kuya ngaye angaliqondisa izwe lithi thwi.
“Uma nje ningase ningenze undlovukayiphikiswa izinyanga eziyisithupha bengizothi uma nje kubonakala ingane engafundi ayibanjwe, ebhema iwunga nayo ibanjwe ngoba yenza icala. Bengizothi ayisuswe iyiswe eRobben Island noma kwenye indawo iyofundiswa ngenkani iphume uma isiqede isigwebo sokufunda isineziqu. Ukube ngangiwundlovukayiphikiswa ngangizokwenza kanjalo ngoba ngakha isizwe sase-Afrika,” kusho uZuma kwaqhuma ihlombe.
Uthe intando yabantu uma isiningi iyahlupha wathi nalesi sikole siphumelela ngoba siqinile isandla ekubeni nentando yabantu.
“Amakholwa awake ayifake, nani befundisi, eyokuthi imfundo ibe yimpoqo ibe mahhala. Uma kungukuthi ifakwa abezepolitiki kuthiwa bafuna amavoti,” kuqhuba uZuma.
Uthe uzoqhubeka asebenze ngoba uthathe umhlalaphansi esemncane.
“Kuningi engisazokwenza ngoba ngithathe umhlalaphansi ngisemusha, ngizoba mningi kabi ngoba ngiwusopolitiki, izimfuno zesizwe ngizazi kahle. Ngiyafisa siyishintshe ipolitiki, abantu bazi ukuthi ipolitiki ukulwa nje, akukona ukuthuka abantu nokungahloniphi ngoba kukhona nabamaqembu aphikisayo abangayazi ipolitiki,” kusho uZuma.
UZuma unxuswe yisigungu esiphezulu se-ANC ukuthi ehle esikhundleni sokuhola izwe. Isikhathi sokuphatha kwakhe besiphela ngonyaka ozayo.