Kumi ngomumo ngeyosomabhizinisi
UMASIPALA weTheku ngokubambisana nomfelandawonye wezinhlaka zosomabhinisi eThekwini naKwazulu-Natal, iFederation for Radical Economic Transformation (FFRET) sebemi ngomumo ukwamukela izihambeli zengqungquthela iRET ezoba seDurban Exhibition Centre ngoFebhuwari 27 kuya kuFebhuwari 28.
Ngengqungquthela kuhloswe ukuthuthukisa osomabhizinisi abasafufusa, ngaphansi kohlaka lweRadical Economic Transformation.
Izohlanganisa osomabhizinisi abasafufusa, izinhlaka zikahulumeni ikakhulukazi kuMasipala weTheku, izikhondlakhondla zamabhizinisi azimele ngenhloso yokudingida okuyizingqinamba nokuyimbangela yokugqoza kwamathuba kosomabhizinisi abamnyama abasafufusa.
Kuzophinde kubhekwe nobulungiswa ngendlela uhulumeni ahweba ngayo nosomabhizinisi abancane, sekusobala ukuthi imigomo nemibandela yokuhweba nohulumeni iyasinda kosomabhizinisi abangenalutho nabasacathula.
Phakathi kwezihloko ezizodingidwa singabala ukwenzelela ngokwabiwa kwemisebenzi (preferential procurement system) , ukubuyekezwa kwemigomo yamathenda njengokuthengwa kwamadokodo okungenela, ukuhamba amabanga amade ukuyothola imininingwane ngethenda (tender briefing), ukukhokhelwa kosomabhizinisi ngesikhathi nokuxhaswa kosomabhizinisi ngosizo lwemali uma sebeyitholile imisebenzi.
Phakathi kwezinhlangano ezizoba yingxenye yokudingidwa kwalezi zihloko singabala uhulumeni waKwaZulu-Natal, uMasipala weTheku, Tongaat Hullet, iThala, Eskom nezinye.
Le ngqungquthela inezinhlaka ezimbili okuyisithangami sezingxoxo nombukiso wemisebenzi nemikhiqizo yosomabhizinisi.
Ngemininingwane yokubhalisa nokunye kungaxhunywana noZandile Ntuli ku:067 0359 378 noma ku-retconference@gmail.com