Kuboshwe ‘obulale’ ingoduso ngensimbi
UBOSHIWE umlisa osolwa ngokugqema ingoduso yakhe (20) ngensimbi ngoba eyisola ngokujola.
Umlisa (24) waseThonsini, eBulwer, ogama lakhe ligodliwe kusolwa ukuthi ushaye ingoduso yakhe ayilobole ngoDisemba nyakenye, uNksz Sotheni Phungula, ngensimbi ngoMgqibelo entathakusa.
Ngokuthola kweSolezwe kuthiwa baxabane ngoLwesihlanu, umsolwa ebuza umufi ngezinsolo zokumjolela kwathi uma umufi ephika wamshaya ngensimbi.
Umndeni wowesifazane uthe usakhungathekile ngenxa yalesi sehlo ngoba abakaze bezwe ngezingxabano zabo.
Uyise kaNksz Phungula, uMnuz Gila Phungula (60), uthe bathole ngoMgqibelo ekuseni ukuthi indodakazi yabo isilimele. Uthe ibihlala nomyeni wayo kuphela bengenangane.
“Kufike abakubo kamkhwenyana bezosibikela ukuthi indodana yabo isishaye indodakazi yethu kabuhlungu yayilimaza. Kuthiwa umkhwenyana uqashe imoto eyiphuthumisa esibhedlela. Sivele sadideka ngoba besizitshela ukuthi bajabule futhi basazoba ndawonye isikhathi eside. Nabakubo kamkhwenyana bebebonakala ukuthi baphatheke kabuhlungu ngokwenziwe yindodana yabo ebese siyithatha njengendodana yethu,” kusho uPhungula.
Uthe abazange bapholise maseko baphuthume esibhedlela kodwa bathola ukuthi isishonile.
UPhungula uthe kuze kube yimanje abazi ukuthi umsolwa usebenziseni ngesikhathi eshaya indodakazi yabo. Uthe abazi futhi ukuthi isuswe yini ingxabano. UPhungula uthe ngenxa yokuthi bebehlala ezigodini ezehlukene bekungelula ukuthi bazi konke obekwenzeka phakathi kwendodakazi yakhe nobeyilobola.
Unina kaNksz Phungula, uNkk Nomantombi Phungula, uthe indodakazi yakhe ibingaxoxi ngezindaba zayo nomyeni wayo kanti bebezitshela ukuthi konke kuhamba kahle phakathi kwabo.
“Umbuzo esinawo nje wukuthi babangeni nomyeni wakhe,” kusho uNkk Phungula.
Okhulumela amaphoyisa KwaZulu-Natal, uLt Col Thulani Zwane, ukuqinisekisile ukuthi baphenya icala lokubulala. Uthe kusolakala ukuthi owesilisa ushaye umkakhe ngensimbi umzimba wonke waphetha ngokushona.
Uthe kuvela ukuthi bebexabene. Umsolwa ubevele enkantolo yemantshi eHlanganani ngoMsombuluko.