Abeneme ngokuqokwa kukaBathabile Dlamini
INHLANGANO elwela amalungelo abesifazane, iSonke Gender Justice, izwakalise ukungenami ngokuqokwa kukaNksz Bathabile Dlamini (osesithombeni) ukuthi abhekele izindaba ezithinta abesifazane.
“Ukufakwa kukaNksz Dlamini kuzobuyisela emuva umzabalazo wabesifazane futhi kukhombisa ukuthi i-ANC ayibahloniphi,” kusho uNksz Nonhlana Skosana onguMgqugquzeli weSonke Gender Justice.
Ukhale ngokuthi ngesikhathi uNksz Dlamini enguNgqongqoshe wezokuThuthukiswa koMphakathi, ubengawuhloniphi umthetho futhi engenandaba namalungu ePhalamende.
“Akanandaba ngisho nabantu besifazane abahola izibonelelo zikahulumeni asazi uzokwenza muphi umehluko kulo mnyango afakwe kuwona. UMnyango wezabesifazane ubungasebenzi kahle ngisho kukhona uNkk Susan Shabangu. Siphatheke kabi ngalesi sinqumo,” kusho uNksz Skosana.
Uphinde wakhala ngokuqokwa kukaMnuz Malusi Gigaba onguNgqongqoshe wezaseKhaya esho nokuthi bekufanele ahambe.
“UGigaba nguye owanikeza umndeni wakwaGupta ubunikazi bobuzwe. Siyafisa ukuthi uMengameli Cyril Ramaphosa abasuse ongqongqoshe abalandelwa yifu elimnyama,” kusho uNksz Skosana.
Isikhulu seBusiness Unity South Africa (Busa), uNkk Tanya Cohen, sithe bayazamukela izinguquko ezenziwe nguRamaphosa, ikakhulukazi ukubuyiswa kukauMnuz Nhlanhla Nene onguNgqongqoshe wezeziMali noMnuz Pravin Gordhan onguNgqongqoshe wamaBhizinisi kaHulumeni.
“Ukuqokwa kongqongqoshe abanomlando wokwenza umsebenzi omuhle kuyasithokozisa. Siyajabula ukuthi uNene uzobuyisa ukuthembeka kwezwe kubatshalizimali nosomabhizinisi. Siyajabula nokuthi uGordhan ubuyile ngoba uzomisa ukuxhashazwa kwemali ezinkampanini zikahulumeni, zibe nozinzo,” kusho uNkk Cohen.
Uthe ukuxoshwa kongqongqoshe abathinteka ekulawulweni kombuso yidlanzana elifuna ukufeza izinhloso zalo bayakujabulela ngoba kubuyisa ithemba.
Uthe kuhle nokuqokwa kukaMnuz Mondli Gungubele oyiPhini likaNgqongqoshe weziMali ngoba ubelwa nenkohlakalo ePhalamende ngesikhathi esekomitini lamabhizinisi kahulumeni.
Uphethe ngokuthi bayajabula ngokuthi akashintshwanga ungqongqoshe wezoHwebo neziMboni, uDkt Rob Davies, owezoLimo, amaHlathi nokuDoba, uMnuz Senzeni Zokwana nowezemiSebenzi uNkk Mildred Oliphant. THUMELA umbono ngalolu daba kuFacebook (Isolezwe), kuTwitter (@isolezwenews) noma umqhafazo ku-45773. I-sms ibiza R1,50.