Kuminciwe oKhozini ngezinguquko ezizayo
KUSHUBILE emsakazweni ohamba phambili eNingizimu Afrika, uKhozi FM njengoba kuqale izingxoxo zokuvuselelwa kwezinkontileka zabasakazi.
Umthombo weSolezwe udalule ezithi abasakazi bangena bephuma emahhovisi abaphathi. Kuthiwa kunabaphathi benyukubele okukhombisa ukuthi abazithokozelanga izingxoxo nabaphathi, kunabathi uma bephuma kucace ukuthi konke kuhamba kahle. “Kuyacaca ukuthi kunabasakazi abazokhishwa ezinhlelweni abazenzayo njengamanje baphoswe kwezinye izikhathi ezingabathokozisi,” kubeka umthombo.
Uveze ukuthi konke kuzocaca ngo-Ephreli 1 uma sekuqala unyaka omusha wezokusakaza weSABC. Uthe uKhozi luye lumemezele ngokusemthethweni uma seluziqedile ngezingxoxo nabo bonke abasakazi. “Ngaphandle kokukhuluma ngezinhlelo, inhloso yalezi zingxoxo kusuke kuwukuthola nokuthi yibaphi abasakazi abasazimisele ngokuba semsakazweni nokuthola ukuthi yibaphi abazimisele ngokungazivuseleli izinkontileka zabo ngenxa yamadlelo aluhlaza,” kusho umthombo.
Okhulumela iSABC, uKaizer Kganyago ukuqinisekisile ukuthi izingxoxo nabasakazi ziqalile.
“Uma izinkontileka ezintsha sezisayiniwe nezinqumo sezithathiwe sizomemezela ngokusemthethweni,” kuchaza uKaizer.
Umthombo uveze ukuthi izinhlelo ezingase zithinteke kakhulu ngalezi zinguquko, ngolwasekuseni ngoba kunabaningi abakhala ngokuthi uma uSipho Mbatha eqhubeka nalo kuzomele atholelwe umuntu azosakaza naye, ngolwasemini phakathi kuka-12 no-3 ntambama njengoba kunabathi uSbu Buthelezi udonsa kanzima kulona. Olunye ngolungena ngoMgqibelo ekuseni Isigiya Ngengoma nakhona okukhalwa ngokuthi uNkosinathi Mshengu kwalinyazwa ikusasa lakhe kwezokusakaza ngokufakwa kulolu hlelo lukamaskandi.