URebecca Malope uzoqala namhlanje ukusakaza
USENGENE ekusakazeni umculi wowokholo uRebecca Malope, okuzothi kusukela namhlanje aqale ukuzwakala esiteshini iTouch HD, enza uhlelo lwakhe lokuqala emsakazweni, iThe Healing Zone oluzongena ngo-12.30 emini luphele ngo-2 ntambama.
URebecca (osesithombeni) uzozwakala izinsuku ezimbili kulo msakazo njengoba nangeSonto ezoba nohlelo olufanayo oluzongena ngo-10 ekuseni luphele ngo11.30 khona ekuseni.
URebecca ungena ekusakazeni nje ubeseke waba sezinhlelweni ezehlukene kwithelevishini okukhona kuzo iClash of the Choirs nohlelo olubizwa nge-Its Gospel Time kwaSABC2. Muva nje iziteshi eziningi zomsakazo zizomemezela izinguquko ezinhlelweni eziningi zazo.
I-Touch HD, ephethwe uTbo Touch ibe ngesinye sezimemezele izinguquko kulo nyaka.
Kulo msakazo izinguquko zishaye ngisho umphathisiteshi njengoba ekhethe ukulushiya uhlelo lwantambama abelushayela, i-Afternoon Drive olungena ngo-2 luphele ngo-5.
Lolu hlelo seluzoshayelwa uNtando Duma, Thami Dish noDJ Capital.
UTbo Touch usezozwakala ngoMsombuluko kuphela.
Ekhuluma ngezinguquko uTbo Touch uthe ngesikhathi eqala lesi siteshi wayefuna kuzwakale into engajwayelekile eyethulwa ngabantu abanekhono nolwazi.
“Ngaso sonke isikhathi sifuna ukuqhamuka nezinto ezintsha ukuze kukhule ibhizinisi futhi sikwazi ukwethulela abantu into enothile ezobajabulisa,” kusho uTbo Touch.
Okhulumela lo msakazo uLulu Mthimkhulu uthe bajabule ngezinguquko futhi abangabazi ukuthi zizoletha inzuzo esiteshini.
“Kusuka ngoMashi 1, bonke abasakazi abamenyezelwe bazobe sebeqala ezinhlelweni zabo. Sijabule ngokuthi isiteshi sithole umuntu ofana noRebecca Malope,” kuchaza yena.