Uvalo ebulawa kusolwa izinkinga zasesikoleni
BAHLALELE ovalweni othisha namalungu esigungu sesikole saseNazareth, eMzimkhulu, ngemuva kokubulawa ngokudubula udadewabo wesoka likathisha wasesikoleni sikathishanhloko owaziphonsa emfuleni waminza, nyakenye.
UNkk Khuthala Mfecane Jili (47) ongudadewabo wesoka lomunye wothisha besikole iPetros Jozana Primary, ubulawe ngokudutshulwa ekwakhe lapho ehlala khona nalo thisha ngeSonto ebusuku.
Kulesi sigameko kudutshulwe nendodana yakhe uSibongokuhle Jili (7) yalimala.
Kunezinsolo zokuthi ukudutshulwa kwakhe kuhlobene nezinkinga zakulesi sikole eziqale nyakenye.
Lo thisha (udadewabo wesoka likamufi) kuthiwa ungumngani welinye lamalungu esigungu esilawula isikole ayehamba phambili ethi akuxoshwe othisha ababili ababesolwa ngokuthi bathakathe uthishanhloko.
Uthishanhloko wakulesi sikole uMnuz Bhekithemba Ngubo waziphonsa emfuleni uMzimkhulu nyakenye.
Kuthiwa wathi usolwa ngokudla imali yesikole. Lokho wayethi kuyitulo labanye othisha ababefuna ukumketula esikhundleni sakhe.
Ngemuva kokushona kwakhe othisha ababili abasolwa ngokuthi ‘bamthakatha’ baxoshwa ngabazali esikoleni, kuze kube manje abekho.
Labo thisha kwakusolwa ukuthi bebehlangene nelinye ilungu lesigungu sesikole ekwakhiweni kwetulo lokuketula uthishanhloko.
Ilungu lesigungu elicele ukuvikelwa lithe: “Angazi noma lesi sigameko sihlangene nodaba lwakulesi sikole noma qha ngoba akekho ofuna ukuphumela obala ngalo. Mhlawumbe anginalwazi nje ngoba nami ngiyalandela. Sengizihlalela ekhaya angisayi ngisho emicimbini ngenxa yovalo” kusho yena.
Okhulumela amaphoyisa KwaZuluNatal, uLt Col Thulani Zwane uthe kuvulwe icala lokubulala nokuzama ukubulala, eliphenywa esiteshini samaphoyisa eMzimkhulu.
“Abasolwa kukholakala ukuthi basike ucingo okubiywe ngalo, bangena. Badubula efasteleni bebhekise endlini ekamelweni ebelilele umufi bengaphandle. Inhloso yokubulala ayikaziwa okwamanje.”
Omunye umthombo waleli phephandaba uthe kungenzeka ukuthi lesi sigameko sihlangene nesikole futhi kungenzeka ukuthi sihlangene nombango wendoda.
Uthe umzali owaqhumbuza ithumba ngenkohlakalo wabhala incwadi eyiqondise kusihlalo wesigungu esilawula isikole nasehhovisi lezemfundo lesifunda.
“Kule ncwadi wayebuza ukuthi kuvumelekile yini ukuthi umuntu oke wagwetshwa abe yilungu lesigungu sesikole nokuthi kuvumelekile yini ukuthi izimpahla zesikole ezifana nemishini yokugunda utshani zisetshenziswe emphakathini. Wabuye wabuza nokuthi kuvumelekile yini ukuthi isigungu sisebenze esikoleni bese sikhokhelwa ngalowo msebenzi ewenzayo.
“Lo mzali kuthiwa washo ukuthi lokhu kwenzeka kanjani, kuhlanganisa nokukhishwa kwemali yesikole ngamalungu esigungu athile ahlukaniselane ngayo nothishanhloko. Lowo mzali uyaziwa ngamalungu esigungu athintekayo asezame kaningi ukumxosha endaweni emsola ngamacala ahlukene abikwa enkosini kodwa ehluleka,“kusho yena.
Okhulumela uMnyango wezeMfundo kulesi sifundazwe uMnuz Sicelo Khuzwayo, uthe umnyango uyalulungisa udaba lwakulesi sikole.