Eyokukhulelwa kwabafundi kwezomphakathi
SEKUSELE emphakathini ukuthi uphawule ngemigomo ethinta ukukhulelwa kwabafundi ezikoleni zakuleli.
UMnyango weMfundo eyisiSekelo ushicilele imigomo ethinta ukukhulelwa kwabafundi besezikoleni. Ithuba lomphakathi lokuphefumula livalwa ngoMashi 10.
Kule migomo izikole ziyalelwa ukuthi zingabaxoshi abafundi abakhulelwe.
Okhulumela umnyango, uMnuz Elijah Mhlanga, uthe ngale migomo bafuna izikole zazi izinto okumele zizenze ukubhekana nabafundi abakhulelwe.
Uthe kule migomo kubalulwa izinto ezinjengokuthi akumele acwaswe umfundi okhulelwe noma esebelethile.
“Akekho umfundi okumele axoshwe ngoba ekhulelwe. Sifuna nokwehlisa izinga labafundi abakhulelwayo besezikoleni njengoba kunendaba ethinta ukugwema ukukhulelwa.”
Ngokwale migomo umfundi onezinyanga eziyisithupha kumele abe nencwadi kadokotela eshoyo ukuthi uzobeletha nini.
Abanamasonto angu-30 bekhulelwe (izinyanga eziyisishiyagalombili) bangaqhubeka bafunde uma benencwadi evela kudokotela eshoyo ukuthi bangafunda.
“Kumele incwadi ichaze ukuthi kabanazo izinkinga ezidalwa wukukhulelwa, bangaqhubeka bafunde. Uma bengenayo incwadi kumele bathathiswe ilivu baze babuye nencwadi. Imininingwane yomfundi kumele ibe yimfihlo,” kusho imigomo.
Imigomo iphinde ibalule ukuthi abafundi kumele bafundiswe ngokuzivikela ekukhulelweni.
“Amakhondomu kumele asatshalaliswe kubafundi abaneminyaka engu-12 kuya phezulu. Uma engekho kumele abafundi bathunyelwe emitholampilo ukuze bawathole,” kubhalwe emigomweni.
Icacise nokuthi abafundi kumele balulekwe nangezinhlelo ezithinta ukuhushula isisu.
Ibalula nokuthi kwabasuke bekhulelwe ngenxa yokudlwengulwa kumele kubikelwe amaphoyisa ukuze kuphenywe.
“Uma umfundi esebuya ukuyobeletha kumele abuyele ekilasini elifanele,” kusho imigomo.
UMhlanga uthe ukwenza ucansi olungaphephile kuyingozi ngoba abafundi bangathola ingculazi nezifo zocansi.
Abafuna ukuphawula bangathumela i-email ku:pregnancypolicy@dbe.gvo.za.