Kume izifundo kuteleka izitshudeni eMUT
KUMISWE ukufunda eMangosuthu University of Technology (MUT) eMlaza izitshudeni zivuka umbhejazane zibhikisha zikhala ngokungakhokhelwa imihlomulo yazo yisikhwama esizixhasa ngemali, iNational Students’ Financial Aid Scheme (NSFAS).
Okhulumela le nyuvesi, uNkk Mbali Mkhize, uthe kushaywe ngebhomu igumbi lokufundela, kwatatshwa ukudla enkantini nasegumbini okudlelwa kulo, kwatatshwa izincwadi esitolo sezincwadi kwaphinde kwabulawa amawindi.
Uzigxekile lezi zehlakalo wathi bazothathela izinyathelo zomthetho baphinde baqondise ubugwegwe abathintekayo.
“Abaphathi banqume ukumisa ukufunda ngemuva kwalesi sehlakalo sangoLwesibili. Inyuvesi ivuliwe kodwa sizomemezela ukuthi kuzoqala nini ukufunda.”
Uthe ngoFebhuwari 13 bathumela izitshudeni incwadi evela kwibamba lomphathi wenyuvesi bezazisa ukuthi kuzoshintshwa inkampani efaka imali yezitshudeni basebenzise entsha njengoba ebikhona ichithwe yizona izitshudeni.
Uthe izitshudeni zaziswa ukuthi kuzoba nokubambezeleka njengoba kungene inkampani entsha ngakho imihlomulo yazo bezizoyithola kusuka namhlanje.
“Zizokhokhelwa imihlomulo yazo njengoba beqalile ukuyifaka kwizitshudeni ezingu-982 ngoLwesibili. Ngokwamarekhodi ethu izitshudeni ezingu-7 000 ezizothola uNSFAS, ezingu-3 000 zihambise imininingwane yasebhange ukuze zikwazi ukuthola imihlomulo. Inkampani efaka imali iqinisekisile ukuthi ezingu-2 037 zilethe imininingwane okuyiyo okusho ukuthi ezingu-963 zilethe imininingwane engaqondile,” kusho uNkk Mkhize.
Unxuse izitshudeni ezingakayihambisi imininingwane ukuthi zikwenze ngokushesha futhi ziqinisekise ukuthi ziletha imininingwane eyiyo.
UNobhala weSasco, uMnuz Mqondisi Duma, uthe isiteleka seNSFAS yisona esidale le nkinga.
Uthe ezinye izitshudeni aziyitholanga imali yendawo yokuhlala, eyezincwadi neyokudla.
“Sibone ukuthi sekwanele ngoba abanye bese bezibonela ukuthi bazokwenzenjani saqoma ukuteleka. Abaphathi basithembise ukuthi bazovula ngoMashi 1, (namhlanje) ukuze bafunde,” kusho uDuma.
INSFAS kuleli sonto imemezele ukuthi siphelile isiteleka sabasebenzi beNehawu esidonse izinsuku ezine ngakho yonke into isizobuyela esimeni esijwayelekile.