Bayaveva ngoDudu Myeni engafiki
AYAVEVA amalungu ePhalamende aphenya ngokusetshenziswa busululu kombuso yidlanzana, emuva kokuthi owayenguSihlalo weBhodi lakwaSAA, uNkk Dudu Myeni engalubhadanga ePhalamende izolo.
UNkk Myeni bekufanele azothula ubufakazi ekomitini eliphenya ngokusetshenziswa busululu kombuso yidlanzana, obizwe ngemuva kokuthi owayengusihlalo wakwa-Eskom ekhale ngokuthi wayegxambukela ezindabeni zale nkampani.
USihlalo wekomiti uNkk Zukiswa Rantho, utshele amalungu ePhalamende ukuthi uNkk Myeni uthumele umyalezo ethi akakwazi ukuza ngoba ummeli wakhe akekho.
“Ungitshele ukuthi ummeli wakhe waziswe ngoLwesibili ukuthi eze ePhalamende.
Ugcine ngokuthumela umqhafazo, akazange abhale incwadi,” kusho uNkk Rantho.
Amalungu ePhalamende azwakalise ukungenami kwawo ngalolu daba.
“Angiyamukeli incazelo kaNkk Myeni yokungafiki ePhalamende ngoba kusobala ukuthi uyachwensa.
Waziswe kudala kabi ukuthi makeze lapha kodwa uyasibambezela,” kusho uMnuz Steve Swart we-ACDP.
Amalungu e-ANC naweIFP acele ukuthi uNkk Myeni athunyelelwe enye incwadi emphoqa ukuthi eze ePhalamende ngesonto elizayo.
UNkk Natasha Mazzone weDA usole uNkk Myeni ngokuchwensa, esho nokuthi kufanele aphoqwe ukuthi eze ePhalamende ngoba ucabanga ukuthi bayadlala.
NgoNovemba wonyaka odlule, uMnuz Zola Tsotsi, owayengusihlalo weBhodi lakwa-Eskom waveza ukuthi wahlangana noNkk Myeni emzini wobengumengameli waseNingizimu Afrika, uMnuz Jacob Zuma.
Wathi uNkk Myeni wamhlebela ukuthi kuzokhishwa owayeyisikhulu sakwa-Eskom, uMnuz Tshediso Matona nezinye izikhulu ezimbili.
UTsotsi watshela uNkk Myeni ukuthi ukukhishwa kukaMatona kuzophazamisa uzinzo kwa-Eskom.
Uthe uNkk Myeni wamtshela nokuthi bazogudluzwa bafakwe kwezinye izindawo ukuze bangaphazamisi uphenyo olwaluzokwenzeka.
UZola wathi ngempela ngo-2015 uMatona wamiswa emsebenzini njengokusho kukaMyeni.