Bakhala ngeKhabhinethi enabakhulile
ZIKHALA ngokungabibikho kwabantu abasha kwiKhabhinethi izitshudeni zaseNyuvesi yaKwaZulu-Natal naseDUT ngemuva kokuthi uMengameli wezwe uMnuz Cyril Ramaphosa ekhombe indlela abanye ongqongqoshe, washintsha abanye eminyangweni yabo wabuyisa nabanye ababekhonjwe indlela.
UTrevor Chinyanga (19) waseThekwini
Uthe ujabule ngokuqokwa kweKhabhinethi entsha enabantu abanesipiliyoni abale kubo oMnuz Nhlanhla Nene ophethe ezezimali noMnuz Pravin Gordhan ophethe amabhizinisi kahulumeni.
Uthe ithimba elisha libuyisa ithemba ezweni.
UNomonde Joya (25) waseCape Town
Uthe ukushintshwa kweKhabhinethi akuzi nezinguquko ezintsha ngoba kusalethwa abantu abadala bafakwe kwezinye izikhundla.
“Awukho umehluko owenzekayo kuthina emazingeni aphansi. Intsha ayibonwa kulezi zikhundla.”
UThandolwethu Xongo (20) waseLusikisiki
Uthe uyaqonda ukuthi i-ANC ibifuna ukwakha ubumbano ngeKhabhinethi yayo kodwa uyakhala ngokuthi abekho abantu abasha.
“Intsha ivalelwe ngaphandle kule Khabhinethi kubuyiswe abantu abakhulile. Ngiyafisa ukuthi kuqokwe nongqongqoshe abancane ngeminyaka ukuze intsha ibe nezwi. Sijabulile ngokubuyiswa kukaNgqongqoshe wezeziMali (Nene) ngoba uzobuyisa ukuthembeka kwezwe kubatshalizimali.”
USinelizwi Zondani (22) onguMengameli wophiko lwezitshudeni ze-Association for the Advancement of Black Accountants in Southern Africa (Abasa) uthe:
“Aseneme neze ngokubuyiswa kukaNgqongqoshe wezaBesifazane, uNksz Bathabile Dlamini, ngoba umoshile lapho ephuma khona. Kufanele ayophumula ekhaya. Sijabulile ngokuqokwa kukaMnuz Bheki Cele obuyiswe emaphoyiseni ngoba izigebengu bese zicanasa. Sifuna isigameko saseNgcobo kube esokugcina futhi uyaziwa uCele ngokuthi wayengafuni amaphoyisa afe enezibhamu,” kusho uZondani.
Uthe bajabule nangokuqokwa kukaMnuz Gwede Mantashe kwezeziMayini noMnuz Malusi Gigaba kwezaseKhaya.
“I-ANC kufanele ize namacebo okuhlanganisa inhlangano yingakho oNkk Nomvula Mokonyane benezikhundla noDkt Nkosazana Dlamini Zuma enguNgqongqoshe eHhovisi likaMengameli.”
ULungisani Shabalala waseMlaza uthe ushintsho olwenziwe uRamaphosa lumthokozisile kodwa ngokubona kwakhe kulolu shintsho ubelwenza ebheke kakhulu ekutheni kube nobumbano enhlanganweni yakhe i-ANC, wangabheka kakhulu ekutheni abantu bakuleli bafunani.
“Okunye engikuqaphelayo ukuthi baningi abantu abadala kule Khabhinethi. Baphi abantu abasha abazofunda kulaba bantu abadala. Ushaye emhloleni ngokubuyisela uMnuz Bheki Cele eMnyangweni wamaPhoyisa,” UXolisile Mabaso waseHammarsdale uthe ukubuyiswa kukaMnuz Bheki Cele esikhundleni kuzoqeda izigebengu ebese zizicanasela kuleli. Ngokubona kwakhe uthe uNkk Naledi Pandor uzowenza kahle umsebenzi wokuphatha uMnyango wezeMfundo ePhakeme kuleli.
“Angiboni kahle ukuthi kungani kubuyiswe uMnuz Malusi Gigaba eMnyangweni wezaseKhaya, ngokubona kwami akekho ungqongqoshe wezezimali oyovala isikhala sikaMnuz Trevor Manuel, uMnuz Nhlanhla Nene naye unamava kodwa ngeke afike kuManuel.”
UNomzamo Dlamini waseVryheid uthe yize elujabulela ushintsho ikakhulukazi eMnyangweni wamaPhoyisa osuzophathwa uCele kodwa unovalo lokuthi kungenzeka angakwenzi lokhu abebemazi edume ngakho.