Zisongelwe izigelekeqe kugwetshwa owasehostela
IGWETSHWE iminyaka engu-26, indoda yasehostela laKwaMashu elahlwe ngecala lokubulala nelokutholakala nesibhamu nezinhlamvu okungekho emthethweni.
UScelo Sanele Mbonambi (32) ugwetshwe yinkantolo yesiFunda eNtuzuma ngemuva kokuthi imantshi izwe ukuthi wambulala kanjani umuntu wesifazane kuleli hostela.
Umsolwa ugwetshwe iminyaka engu-13 ngecala lokubulala, engu-10 ngokutholwa nesibhamu esingekho emthethweni neminye emithathu ngokutholwa nezinhlamvu ezingekho emthethweni.
Kuthiwa ngoEphreli 26, 2016 amaphoyisa aKwaMashu abizwa emgwaqweni uJabula ehostela KwaMashu lapho kwakutholwe khona owesifazane uNksz Nobuhle Msomi (27) ebulewe. Wayenenxeba lokugwazwa emzimbeni.
Okhulumela amaphoyisa KwaZuluNatal uLt-Col Thulani Zwane uthe ngemuva kwenyanga kutholwe lo wesifazane ebulewe kwabanjwa umsolwa owaboshwa kulo leli hostela. Lo msolwa watholwa nesibhamu i-9mm okwakusolwa ukuthi sasetshenziswa kubulawa lo wesifazane.
Lesi sibhamu sasinezinhlamvu ezingu-15.
UZwane uthe sayiswa kohlolwa, imiphumela yakhombisa ukuthi yiso esithinteka kuleli cala.
Ibamba lomkhuzi wamaphoyisa KwaZulu-Natal, uMajor-General Bheki Langa lisamukele lesi sigwebo esinikwe umbulali. Uncome abaphenyi ngokuqoqa ubufakazi obugcine bukwaze ukumshushisa.
“Izigebengu ezihlala emahostela kumele zazi ukuthi izinsuku zazo zibaliwe. Sizozifuna senze isiqiniseko sokuthi zibhekana nengalo yomthetho ngamacala ezifunelwa wona. Izibhamu ezingekho emthethweni emahostela sizozishaqa kuthi labo abatholwa nazo sibabeke amacala ngendlela efanele,” kusho uLt Gen Langa.