Isililo abafundi bephonseka netekisi
BAKHALE ubumayemaye abafundi ngesikhathi kugingqika itekisi abebehamba ngayo, yakhalakatheka emathuneni eMariannhill, izolo ekuseni.
Abafundi abangu-10 balimele kule ngozi eyenzeke ngesikhathi besendleleni beya ezikoleni ezahlukene.
Isolezwe lithole ngomthombo walo ongathandanga ukudalulwa ozifikele mathupha endaweni yengozi, ukuthi abafundi baqhumise isililo ngesikhathi itekisi igingqika. Kuthiwa nangesikhathi kufika obosizo lokuqala laba bafundi bebesasikhihla isililo.
Umshayeli kusolwa ukuthi imhlulile itekisi emgwaqweni oyibhuqu, yaphaphalaza yaze yafika ngasemathuneni.
Abezimo eziphuthumayo bakwa-ER24 baphuthume endaweni yengozi bafike bahlenga abafundi nomshayeli.
Okhulumela abakwa-ER24, uMnuz Russel Meiring uthe bafike endaweni yengozi itekisi ikude nomgwaqo ebihamba kuwo.
“Izingane eziningi sizifice zizulazula emgwaqweni. Itekisi ibingene ezihlahleni, ezisendaweni eyibangana uma usuka emgwaqweni. Sizihlolile sathola ukuthi ezingu-10 ezineminyaka ephakathi kwemihlanu kuya kweyisikhombisa bezilimele. Ngenhlanhla akekho obelimele kakhulu noshonile kule ngozi. Emuva kokuzihlola izingane sibe sesiziphuthumisa ezibhedlela ezihlukene,” kusho uMeiring.
Umshayeli kuthiwa ubenemihuzuko engatheni kule ngozi.
Okhulumela amaphoyisa KwaZuluNatal, uLt Colonel Thulani Zwane usiqinisekisile lesi sigameko, wathi amaphoyisa ayaphenya ngembangela yengozi.
“Sibikelwe ngengozi yetekisi lapho kulimale khona abafundi eMariannhill ekuseni namhlanje (izolo). Siyaphenya ngayo,” kusho uZwane.