Uhlose ukwenza umcimbi wokupheka
UFUNA ukwenza umcimbi wokudla ozohlanganisa zonke izinhlanga zaseNingizimu Afrika umpheki waseMlaza uSphesihle Maphumulo (25).
UMaphumulo wavula inkampani yakhe yokupheka iSphes Kitchen ngo-2014 kodwa uqale ukusebenza ngokugcwele ngo-2015.
“Ngiqale inkampani yami ngisasebenza eCape Town futhi kwakungelula ukuyiqala ngoba uma ungenawo amakhasimende azoba nawe isikhathi eside, kulula ukuwa,” kusho uMaphumulo.
Ufundele ukuhlobisa amakhekhe, ukuphisa ubhiya namawayini, ukupheka ukudla kwaseFrance nokunye okunhlobonhlobo esikoleni sokupheka i-1000 Hills Chef School eBotha’s Hill.
“Ukuqala ibhizinisi akulula ngoba namanje ngiyasebenza bese ngizisebenza eceleni. Ngingathi ukuqala ibhizinisi kudinga ube namakhasimende onyaka owaziyo ukuthi uhlale unawo nsuku zonke. Okwangiwisa mina wukuthi ngangingenawo amakhasimende esikhathi eside ngakho ngaphoqeleka ukuthi ngibuyele emsebenzini bese ngiqhuba ibhizinisi ngesikhathi sami.”
Wafunda eKingsway High, eManzimtoti.“Ukupheka bengikuthanda kodwa ngakuthanda kakhulu ngesikhathi kufika abantu base-1000 Hills Chef School. Ukufunda unyaka owodwa kwakubiza uR120 000. Umama wadela konke ayenakho ukuze ngiyofunda khona,” kusho uMaphumulo.
Unxuse osomabhizinisi abancane ukuthi bangaxhamazeli uma beqala ibhizinisi kodwa baqinisekise ukuthi banamakhasimende amaningi. Uthe imboni yokupheka inayo imali kodwa ayinkulu.
“Ngiyafisa ukuthi abapheki baholelwe kakhulu ngoba kuwubuciko ukupheka futhi kuhambisana nesayensi. Senza ukudla okulungele abantu abahlukene okufanele kube kuhle uma abantu bekubheka.”
Ugqugquzele abantu ukuthi beseke osomabhizinisi abancane ngoba into eyenza abanye bawe wukuthi kuhlale kuqokwa izinkampani zabantu ababodwa abajike baqashe bona.
“Uma kunemicimbi emikhulu kuqashwa izinkampani zabantu ababodwa, singajabula ukuthi kuqashwe nezinkampani zabantu abasha. Kufanele imali itshalwe kubo bonke osomabhizinisi ukuze kuthuthukise osomabhizinisi abancane,” kusho uMaphumulo.
Uthe eminyakeni ezayo akafuni ukuphekela abantu emicimbini esemakhaya kodwa ufuna ukwenza umcimbi omkhulu ozofana neFood and Wine Show, ozohlanganisa zonke izinhlanga.
“Ngifuna umcimbi wokudla ozohlanganisa bonke abantu baseNingizimu Afrika, ube nokudla kwethu sonke futhi okungambi eqolo ukuwuhambela. Ikhona imicimbi yokudla kodwa eminingi igcwala abebala elithile. Ngifuna sihlanganeni sonke singabantu baseNingizimu Afrika sijabulele ukudla kwethu, utshwala besintu, ubhiya ovutshelwe kuleli, amawayini nakho konke esikuthandayo,” kusho uMaphumulo.