Bafuna inkampani ihlawule ngomgunyathi
INHLANGANO ebhekele ukuncintisana okuhle phakathi kwezinkampani zaseNingizimu Afrika, iCompetition Commission ifuna inkampani yamabhanoyi iSA Airlink ihlawule u-10% wenzuzo yayo ngokuvalela ngaphandle inkampani encane yamabhanoyi iFly Blue Crane.
Ngesonto eledlule iPhini likaKhomishana weCompetition Commission, uMnuz Hardin Ratshisusu, esitatimendeni liveze ukuthi sebeludlulisele kwiCompetition Tribunal udaba lweSA Airlink njengoba bethole ukuthi yayinamanani amba eqolo okugibela amabhanoyi ayo ngaphambi kokufika kweFly Blue Crane.
Uveze ukuthi icala livulwe nguMnuz Kwezi Tiya weFly Blue Crane ne-OR Tambo District Chamber of Business phakathi kuka-2015 no-2017.
Uveze ukuthi uTiya wayekhala ngokuthi ngaphambi kokufika kwenkampani yakhe emzileni wamabhanoyi osuka eMthatha uye eGoli, iSA Airlink yayinamanani amba eqolo, yawehlisa uma sekunencintisana nayo.
Kuvela ukuthi ngoJanuwari 2017 emuva kokuphuma kweFly Blue Crane emzileni waseMthatha iSA Airlink yabuyela emananini ayo amba eqolo.
URatshisusu uthe uphenyo lwabo luthole ukuthi iSA Airlink iphule umthetho iCompetition Act kusukela ngoSepthemba 2012 kuze kube ngu-Agasti 2016.
Uveze ukuthi amakhasimende ngabe onge phakathi kukaR89 million noR108 million ukube iSA Airlink yayingenawo amanani amba eqolo. Uthe ngabe kwahamba abantu abaningi ngamabhanoyi ukube iSA Airlink yayingambi eqolo futhi kuthuthuke umnotho waseMthatha.
Uveze ukuthi ukuya nokubuya eGoli usuka eMthatha kwakunguR4 000 emabhanoyini akwaSA Airlink. Ibhanoyi elisuka eMthatha liye eGoli leFly Blue Crane lalibiza uR799.
Bebona lokhu abeSA Airlink bathula elinye ibhanoyi elalibiza uR2 000 ukuya nokubuya eGoli usuka eMthatha.
Uthe iCompetition Commission ifuna iSA Airlink ihlawuliswe u-10% wenzuzo yayo ngokufaka amanani amba eqolo emakethe futhi ifuna iCompetition Tribunal ize nezindlela zokulungisa lesi simo ngoba iFly Blue Crane igcine isiwa ngenxa yalesi simo.“Okwenziwe yiSA Airlink kwaba nomthelela omubi emzileni waseMthatha kwaze kwakhipha nenkampani encane eyayifike ngasekupheleni kuka-2016. Ucwaningo lwethu luveza ukuthi abantu bakhokha imali engaphezu kukaR100 million eminyakeni emihlanu ngesikhathi kuqhubeka lo mkhuba. Sikhathazekile ngendlela iSA Airlink eziphethe ngayo futhi sifuna ijeziswe ngokufanele yiCompetition Tribunal,” kusho uHardin Ratshisusu.