URamaphosa ubeke phambili ubumbano lwe-ANC kunezwe
NGOMSOMBULUKO uMengameli Cyril Ramaphosa wenze izinguquko kwiKhabhinethi ebezilindelekile kusukela awina ukhetho lokuba nguMengameli we-ANC.
Kusukela esakhankasa kuze kufike enkulumeni yakhe yokuqala ayethule esizweni, uRamaphosa ubelokhu eshumayela ivangeli lobumbano kwiANC nokukhuculula inkohlakalo kuhulumeni.
Emva kwesimemezelo sangoMsombuluko, akekho ongakungabaza ukuthi ukulwela ubumbano kuKhongolose yikona okuhamba phambili kuyena njengoba kukhona ongqongqoshe abagcinile irekhodi labo libe licacisa ukuthi bekufanele baxoshwe.
ONksz Bathabile Dlamini, osephethe uMnyango wabeSifazane, uNkk Nomvula Mokonyane, osengamele uMnyango wezokuXhumana, noMnuz Malusi Gigaba, obuyiselwe kowezaseKhaya, phezu kobufakazi bokuthi kukhona angakuhambisanga kahle ngesikhathi ewuphethe okokuqala.
Akufanele ukuba ngabe basengongqongqoshe ukuba ukukhuculula kuhulumeni yikona obekuseqhulwini. Yebo, inkohlahlakalo kuhulumeni ayenziwa ngongqongqoshe kuzwelonke kuphela kodwa ubengenza isibonelo ngabo.
Ikhona yona imizamo yokulungisa umonakalo owenzeke ngesikhathi sikaMnuz Jacob Zuma njengokuqokwa koMnuz Nhlanhla Nene ukuthi aphinde azophatha uMnyango wezeziMali. Kuyancomeka nokuxoshwa koMnuz Des van Rooyen, Fikile Mbalula, Mosebenzi Zwane, David Mahlobo noNksz Faith Muthambi.
Uma kuthiwa kuyakhucululwa, silindele ukuthi kwenzisiswe hhayi ukuthi kunyanyalatwe ngoba awukwazi ukushanela ukhiphe izibi kodwa ezinye uzishiye endlini kulokhu kuhanjwa phezu kwazo ngoba zizophinde zingcolise.
Abantu bayajabula ngokuqokwa koMnuz Bheki Cele njengoNgqongqoshe omusha wezamaPhoyisa. Kodwa akukhunjulwe ukuthi wathini umbiko wowayenguMvikeli woMphakathi, u-Adv Thuli Madonsela, ngoCele mayelana nenkontileka yokuqashisa ngebhilidi elalisetshenziswa ngamaphoyisa. Umbiko waholela ekuxoshweni kwakhe.
Ngalesi simemezelo kucacile ukuthi uRamaphosa ubeke kakhulu ubumbano kwi-ANC ngaphezu kwezwe.