Kungakuhle ibe yimpoqo imfundo
MHLELI: Ngisukumiswa inkulumo yobengumengameli wezwe uJacob Zuma, ayethule ngomhlaka 24 kuNhlolanja ekhuthaza abafundi abenze kahle eBizimali High School.
UMsholozi uthe ukube ubenganikwa ithuba lokubusa ngokuba undlovukayiphendulwa izinyanga eziyisithupha ubengaphoqelela ukuboshwa kwabadla izidakamizwa baphume sebeneziqu zemfundo ephakame. Ngiyameseka uZuma ekugqugquzelweni kwentsha yethu ukufunda futhi kunezinto azenzile esengumengameli ukuqinisekisa ukuthi abantwana bethu bayafunda noma ngingayizwa kahle eyokuba undlovukayiphendulwa ezweni lentando yabantu.
Kunale zinto ekumele sizicabange njengesizwe noma okwakumele uMsholozi azifeze ngesikhathi esengumengameli. Uma uhulumeni kaKhongolose owawuholwa nguMsholozi ngaleso sikhathi wanquma ukuthi kufundwa mahhala futhi kuphakelwe abantwana abafunda ezikoleni ezitabalasayo, yisona sikhathi futhi leso okwakufanele ukuthi imfundo kusuka eminyakeni okungenani emihlanu kuya eminyakeni engu17 ibe impoqo. Lokho kwakuzofeza iphupho likaNxamalala lokuthi ingane etholakala ikuleyo minyaka ingekho esikoleni kulandelelwe ukuthi ayikho ngani esikoleni kuboshwe umzali noma yona ingane bese ivalelwa esakhiweni lapho izophoqwa ukufunda ize iqede.
Ngicabanga ukuthi uma uhulumeni engadlulela ephuzwini elikuMthethosisekelo lokuthi imfundo iyoba mahhala kodwa kube ibe yimpoqo singaba isizwe esakhekile. Lokho kunganciphisa ubugebengu, ukusentshenziswa kwezidakamizwa nophuzo oludakayo entsheni yethu. Kungasiza yena uhulumeni ukuthi imali ayichitha ngokubhekelela intsha eboshiwe inciphe kodwa ifakwe kwezemfundo ngoba wonke umuntu omusha uzobe efunda engekho etilongweni.
Sengigoqa Mhleli ngicabanga ukuthi sesifikile isikhathi sokuthi izinhlangano zentsha ezweni zinciphise ukunaka kakhulu ukuthi kwenzekani ngokukhethwa kwabaholi kodwa zigxile ekunakeni izidingo zentsha.
Ngicabanga ukuthi uma zonke izinhlangano zentsha ngokwamaqembu kungakuhle zigcizelele ukuthi imfundo ayibe impoqo. Kuningi isizwe sethu esingaphumelela kukona ngoba lokho kungaphoqa abasimele ePhalamende ukuthi bakuphasise kube wumthetho okungenza nababhekelele ukugcinwa komthetho babe nendlela yokwenza isiqiniseko sokuthi lowo mthetho uyagcinwa.