Ubuyele eZimbabwe owaduma kwiChiefs
WEHLELWE wumshophi umdlali odume kwiKaizer Chiefs uMichelle Katsvairo ozama inhlanhla kwiReal Kings egijima kwiNational First Division (NFD).
Lezi zindaba zitshelwe Isolezwe ngumthombo othembekile. UKatsvairo ufike kwiKings ngesonto eledlule, wazicija neqembu usuku olulodwa. Bekubhekwe ukuthi iqembu lithathe isinqumo ngekusasa lakhe izolo.
“UKatsvairo ubuyele kubo eZimbabwe. Ube neshwa kwashona ubaba wakhe. Le nto yenzeke ngesikhathi esibi kwazise ubethembisa ejimini,” kusho umthombo.
Lo mgadli odabuka eZimbabwe ufike kwiChiefs ngesizini edlule ethwelwe ngeqoma ukuthi uzofike ahlohle inqwaba yamagoli. Uqale kahle kodwa wabuye waphazanyiswa wukulimala okuholele ekutheni athi esebuya indawo yakhe yayingasekho. Ugcine ebolekiswe kwiSingida United yaseTanzania. Inkontileka yakhe yokubolekiswa igcine inqanyuliwe ngoDisemba kulandela ukuthi leli qembu lihluleke lancama wukumkhokhela. Kuthintwa uTom Dlamini wezokuxhumana kwiKings uqinisekisile ukuthi uKatsvairo ubuyele kubo. “Yebo kuyiqiniso. Umfana ubuyele kubo izolo (ngoLwesibili). Isimo abhekene naso singaphezu kwamandla akhe. Iqembu lithathe isinqumo sokumkhulula kodwa uma esefihlile nakanjani uzobuya liqhubeke nokumhlola. Siyazwelana kakhulu naye futhi siyethemba ukuthi uzofihla kahle,” kusho uDlamini.
I-Kings ihlezi endaweni yesithathu kwi-log yeNFD. Leli qembu ligilwe yiRoyal Eagles ezama ukubalekela izembe ngempelasonto edlule. I-Kings iguqiswe yi-Eagles ngo 1-0 wegoli likaMame Niang eSugar Ray Xulu Stadium, eClermont.
“Kumele sivuke sizithathe. Kona akuzange kube yisimo esimnandi ukudliwa ngesonto eledlule. Kumele sibuye namaphuzu amathathu kumnyama kubomvu kwiStellenbosch. Siyazi ukuthi ngeke kube ngumdlalo olula kodwa abafana bazimisele ngokulwa,” kusho uDlamini.
I-Kings izoshukana neStellenbosch FC ngeSonto ngo-3.30 ntambama e-Athlone Stadium, eKapa. Imidlalo ye-NFD NgoMgqibelo Ngo-3.30pm: Witbank Spurs v Highlands Park (Puma Stadium); Uthongathi FC v Cape Town All Stars (Princess Magogo Stadium); Ubuntu Cape Town v Mthatha Bucks (Athlone Stadium).
NgeSonto Ngo-3.30pm: Stellenbosch v Real Kings (Athlone Stadium); Richards Bay v Pretoria University (Umhlathuze Sports Complex); Black Leopards v Super Eagles (Thohoyandou Stadium); Royal Eagles v Tshakhuma Tsha Madzivhandila (Harry Gwala Stadium); Mbombela United v Jomo Cosmos (Mbombela Stadium).