Abadlali bavikela owabakhaya
ABADLALI bezinkunzi zaseSoweto, i-Orlando Pirates neKaizer Chiefs, bayazivikela ngokudlala ngokulingana emidlalweni yabakhaya.
I-Pirates izobhekana neChiefs emdlalweni we-Absa Premiership eFNB Stadium, eNasrec, ngoMgqibelo, ngo-3.30 ntambama. Nakuba izindimbane zabalandeli zihlala ziyigcwalisa inkundla kodwa umdlalo usujwayele ukulandelwa yizikhalo ngenxa yokudlala ngokulingana kwamaqembu ahlonishwa i-Afrika yonke.
La maqembu ayidlala ngokulingana imidlalo emithathu yeligi ilandelana, okubalwa kuyo owomzuliswano wokuqala wesizini ka-2017/2018 owaphela zibambene ngo 0-0.
Izolo esithangamini nabezindaba, umdlali wasemuva weChiefs, uRamahlwe Mphahlele, noHappy Jele wePirates, bathe ubunzima bomdlalo namaqhinga abaqeqeshi aholela ekutheni amaqembu agcine edlale ngokulingana.
“Kuzoba wumdlalo omkhulu, womabili amaqembu anabadlali abasezingeni eliphezulu. Kwesinye isikhathi iqembu ngalinye liyayihlakaza imizamo yelinye. Kodwa ngikholwa wukuthi kufanele sidlale, siwine. Uma sidlale kahle, sashaya amagoli, samaka kahle emuva, sizowuwina umdlalo,” kusho uMphahlele.
I-Chiefs, esendaweni yesithathu, isethubeni lokuhlala endaweni yesibili uma ihlula iPirates, iphinde inciphise igebe lamaphuzu phakathi kwayo neMamelodi Sundowns ehlezi esicongweni se-log ngamaphuzu angu-40.
I-Pirates, esendaweni yesibili kwi-log, nayo izolwela ukuba la kwiSundowns. Kade kwagcina ebholeni laseMzansi ukuthi amaqembu womathathu abange isicoco sePremiership. Nakuba umqeqeshi wePirates, uMilutin Sredojevic, ebona iqembu lakhe lisakhiwa kodwa uJele ubona kufanele bawine.
“Kubalulekile ukuthi womabili amaqembu adlalele ukuwina kodwa ngeke siwuvule umdlalo. Kufanele sibuye sibheke ukuthi sidlala neChiefs, asifuni ukuhlulwa. Uma kuwukuthi beza kanzima singagcina silidlalela iphuzu kodwa akuyona into esiyifunayo leyo.
“Ngiyazi ukuthi abalandeli bayawujabulela umdlalo futhi bafuna umphumela. Akekho ohlela ukudlala ngokulingana kodwa umdlalo wabakhaya uhlale unzima. Womabili amaqembu adlala kahle kodwa okwethu wukudlalela ukuwina ukuze siqhubeke nomgqigqo wethu,” kusho uJele.
IZENZELE umsebenzi waba lula i-Ajax Cape Town ngesikhathi inqoba ngo 2-0 wamagoli angene esiwombeni sesibili kwiSuperSport United emdlalweni we-Absa Premiership odlalwe izolo ebusuku e-Athlone Stadium, eKapa. Imidlalo ye-Absa Premiership: Kusasa: AmaZulu FC v Mamelodi Sundowns (King Zwelithini Stadium, 6pm); Bidvest Wits v Baroka FC (Bidvest Stadium, 8pm); Cape Town City FC v Chippa United (Athlone Stadium, 8pm)
NgoMgqibelo: Orlando Pirates v Kaizer Chiefs (FNB Stadium, 3.30pm); SuperSport United v Maritzburg United (Lucas Moripe Stadium, 6pm); Platinum Stars v Free State Stars (Royal Bafokeng Stadium, 8.15pm)
NgeSonto: Bloemfontein Celtic v Ajax Cape Town (Dr Molamela Stadium, 3.30pm); Polokwane City v Golden Arrows (Old Peter Mokaba Stadium, 3.30pm)