Unqobile uSemenya ngokuqokwa nezingqungqulu
UYAZI kwesinye isikhathi akudingeki uze ube ngumnqobi ukuze uzibone ukuthi ungumuntu obalulekile emhlabeni. Kokunye nje kumele ujabulele ukuthi uphakathi kwabo abanqobi, udla nabo esitsheni esisodwa.
Lokhu kukwenza uzibone ungekude kakhulu ukufika ezingeni lalabo osuke unabo endlini eyodwa ngelinye ilanga. Ukuxoxa nabo uzwe ukuthi yini abayenzayo ukuze banqobe, kuyakunika amasu okuthi ufinyelele lapho bekhona, kungakhathelekile ukuthi kungakuthatha isikhathi esingakanani.
Ngike ngizwe kwi-Facebook kukhona abazikhalela ngabantu abathize abathi uma bebona amagama nezithombe zabo, izinhliziyo zishaye ngamandla. Bayaye bababize ngamacrush ngolimu lwasemzini.
Umuntu uzizwa esondele kakhulu kule crush yakhe uma kwenzeka ephanyeka isithombe kwiFacebook bese i-crush leyo ichofoza u-like. Ayiphathwa-ke eyokuthi i-crush imncome ithi muhle kuleso sithombe asuke esifakile. Lowo uvele abone sengathi lo muntu uzizwa ngendlela efanayo naye, alibone lingafezeka noma yinini iphupho lokuthi i-crush iphenduke isinqandamathe.
Uyabonake ukuthi ziningi kanjani izindlela zokweneliseka ngosuke ukufisa yize kusuke kungakafezeki? Ngike ngicabange nje ukuthi sezilula nezindlela zokukhombisa umuntu ukuthi kukhona okungaphakathi kuwena kule minyaka njengoba sesaphucuzeka nje. Kukhona i-Facebook leyo, Twitter, WhatsApp, Messenger nokunye.
Ngikhumbula kahle kudala ukuthi kwakunzima kanjani engakabi khona namaselula lawa asecoshwa phansi manje. Wawuke uhambe ibanga elide uyobheka intombi kwesinye isigodi. Uyothi ufika lapho uthumele ingane ukuthi iyobiza ingcwayi leyo. Kwakuthi zisakaze phansi uma ingane ibuya nempendulo ethi: uthe angisho ukuthi akekho. Kwakusuke kusho yona intombi leyo owawusuke uyoyifuna ukuthi ayikho bese ingane ifika kuwena yenze ubungane, kukucacele ukuthi uyena lo muntu obumhlasele obeziphika.
Angikhoke ekwesheleni nakumacrush kodwa lapho ngiqonde khona yikuCaster Semenya, umgijimi wethu esimthandayo. Minake ngiyazifela ngoSemenya ngenxa yezizathu eziningi, kodwa ngizobala ezimbili namuhla. Okokuqala nje engikuthandayo ngaye wukuthi uyabekezela. Ukube ungomunye umuntu ngabe kade akuyeka ukusubatha ebalekela ukubuzwa ngobulili bakhe, okuyinto equbukayo njalo uma eyogijima emiqhudelwaneni emikhulu. Le nto yobulili bukaSemenya iqubuka kakhulu futhi uma enqobile kwi-800m okuyimanje ungumpetha womhlaba kuyona kwabesifazane.
Okunye engikuthanda ngoSemenya yikona ukuthi uvele abavale imilomo ngokunqoba abanemibuzo ngobulili bakhe. Phela kwesinye isikhathi usuke ubona ukuthi le ndaba bayivusa ngamabomu, ngaphambi kokuthi kube nemiqhudelwano emikhulu, ukuze aphazamiseke uma esegijima. Usesikhombise kaningi-ke uSemenya ukuthi uqinile futhi lokhu akwenzayo kusegazini kuyena.
Muva nje uSemenya uqokwe nezinkakha zabesifazane kwezemidlalo emhlabeni kumaLaureus Sports Awards (World Sportswoman of the Year) okungaqokwa kuwona noma ngubani nje. Lapha ubebanga umklomelo noSerena Willliams noGabrine Muguruza, abaziwayo kwezethenisi. Bekukhona nenye inkakha yomgijimi u-Allyson Felix, umbhukudi uKetie Ledecky nompetha womhlaba kwezokushushuluza eqhweni (skiing) uMikaela Shiffrin. Umhlanganiso ugcine udliwe nguWilliams kulo mcimbi kodwa angikholwa wukuthi uSemenya kukhona azokhala ngakho.
Ukuba khona nje kulo mcimbi kukaSemenya kwenza mina ngiziqhenye ngakwenzayo kwezokusubatha osekucacele noma ngubani ukuthi kuthinta abantu abaningi emhlabeni wonke. Angingabazi ukuthi naye uSemenya ukujabulele kakhulu ukugudlana nabadlali abafana noWilliams kulo mcimbi, azi kahle ukuthi ubeqokelwe umklomelo owodwa nabo.
Yinto enkulu kakhulu lena futhi akusho lutho ukuthi uSemenya akawinanga. Kimina ungumnqobi ngoba ubalwa nezingqungqulu zomhlaba kwezemidlalo. Ngelinye ilanga uma exoxa uyosho ukuthi yena wake waqokelwa kumaLaureas Awards okuyimiklomelo ehlonishwa kakhulu emhlabeni.
Bheka nje ngoba kwabesilisa bekubanga izinkakha u-Mo Farah, umgijimi, Roger Federer, umdlali wethenisi, Lewis Hamilton, umshayeli wezimoto, Rafael Nadal, umdlali wethenisi, Cristiano Ronaldo, umdlali webhola noChris Froome, umgibeli wamabhayisikili. Uyazibonelake ukuthi lapha kukhethwa izingqungqulu ngempela hhayi noma ngubani nje.
Akukho nokuncane ukungabaza ukuthi kuningi okusazokwenziwa nguSemenya kwezokusubatha emhlabeni esikhathini esizayo. Okwamanje kumele afane nomuntu onecrush kodwa athokozele ukuthi uma efake isithombe sakhe kwi-Facebook uyawuthola u-like kulo muntu omenza inhliziyo yakhe igxume nephaphu. Kwazi bani mhlawumbe ngelinye ilanga izinto ziyolunga nje, i-crush leyo igcine ithumele i-inbox. NgokukaSemenya lokho kuyosho ukuwina umklomelo obalulekile emhlabeni ngelinye ilanga ngoba akukho okungenzeki uma ukholelwa ekutheni unaso isibindi nomdlandla wokukwenza. Kakade nasemandulo kuthiwa intuthwane yabulala indlovu. Uyazibonelake umehluko phakathi kwendlovu nentuthwane.