OweThe Queen weluleke imbokodo
UMLINGISI osematheni kulezi zinsuku kwiThe Queen, olingisa indawo ka-Onica, u-Angela Sithole, usenxuse abesifazane ukuthi bangavumi ukuba omakhwapheni abasetshenziselwa ucansi kuphela.
Lokhu ukusho engxoxweni ekhethekile neSolezwe. Lo mlingisi ubonakala engumakhwapheni kaShaka (SK Khoza), ambiza uma efuna ukuzithokozisa ngocansi kuphela.
Le ntokazi ezalelwe yaphinde yakhulela eGoli, iveze ukuthi ukulingisa le ndawo kuyifundise lukhulu.
“Abantu basazobona okuningi okuzokwenzeka nokuyinto eyenzeka nsuku zonke empilweni nasemiphakathini esiphila kuyo. Ngijabule ngokuthola indawo efana nalena njengoba kubonakala ukuthi ukuba owesifazane ongumakhwapheni akukuhle. Ekugcineni lokhu enivumelene ngako nowesilisa kugcina kungenzeki,” kuchaza u-Angela.
Uthe ngisho ehamba emgwaqweni abantu bayambuza ngale ndawo ayilingisayo athe kuyinto enhle ngoba kukhombisa ukuthi abantu bayakuthokozela akwenzayo.
“Ngiyathemba ukuthi abantu besifazane kukhona abazokufunda kulokhu abakubonile. UShaka no-Onica bese bazane iminyaka bephila ngokujabulisana ocansini bevumelene ukuthi abathandani. Kodwa uma iminyaka ihamba u-Onica usemthanda ngempela uShaka. Yikhona okuholele ekutheni aze ahlasele uMmabatho,” kuchaza u-Angela.
Le ntokazi eneminyaka emine emkhakheni wokulingisa ithe abantu besifazane abathole abesilisa ababathandayo abazobanakekela hhayi abafuna ukuzijabulisa bona kuphela.
“Siyizimbali zesizwe, abantu besilisa kumele basihloniphe ngayo yonke indlela,” kuchaza u-Angela.
Uthe izinto zimhambele ngendlela afisa ngayo ngoba bekuyisifiso sakhe ukusebenza nomndeni wakwaFerguson.
“Izinto ngesikhathi ngingena ekulingiseni zangihambela kahle zisuka njengoba ngalingisa emidlalweni emikhulu okukhona kuyo iZabalaza, Hustle, Generations neSidingo. Ngiyabonga kubona bonke abantu engihlangana nabo bancome umsebenzi wami,” kuphetha u-Onica.