Bazolulekwa abezingane ezife ngomlilo
UMNYANGO wezokuThuthukiswa koMphakathi KwaZulu-Natal uhlinzeke abazali bezingane ezimbili ezishe emlilweni eRedcliffe, eVerulam, ngosonhlalakahle abazobaluleka ngokomqondo.
UNgqongqoshe walo Mnyango, uNkk Weziwe Thusi, izolo uthumele isitatimende kwabezindaba wathi kuyadumaza ukufa kwalezi zingane ngalolu hlobo.
UNothando (9) noSiyamthanda (7) Duma kade besele noyise ngesikhathi kwenzeka isigameko ngezintatha zangeSonto.
Uyise uMnuz Zukile Mhlongo ubesayolekelela udadewabo kanina wezingane zakhe obeshaywa yisoka lakhe ngesikhathi eshiya ekhiyile endlini kukhanya nekhandlela. Wabuya sekusha ubuhanguhangu.
“Ukwenzeka kwalesi sigameko kukhombisa ngokusobala ukuthi izinkinga zasemphakathini zingaholela ekulahlekeni komphefumulo womuntu. Uyise walezi zingane kade eyosiza owesifazane obehlukunyezwa yisoka lakhe, wakhiyela izingane zakhe ukuze ziphephe endlini kanti akazi ukuthi usezoziyisa kwagoqanyawo,” kusho uNkk Thusi.
Uthe uthumele osonhlalakahle ukuba balekelele lo mndeni ngalesi sikhathi esinzima.
“Ngijube osonhlalakahle ukuthi benze isiqiniseko ukuthi abazali bathola ukwelulekwa ngokomqondo njengoba belahlekelwe yizingane zabo. Bazosiza lo mndeni kuze kube bayakwazi ukubhekana nesimo sokushonelwa yizingane zabo,” kusho uNkk Thusi.
Lo mnyango unxuse umphakathi ukuba usebenzisane nohulumeni ekulweni nezinkinga ezisemphakathini.