Uya enkantolo umholi webandla lezimanga
KULINDELEKE ukuthi avele enkantolo namhlanje umholi weSeven Angels Church, uMnuz Banele Mancoba, emuva kokuthi yena nasolwa naye, uMnuz Siphesihle Mafikwana, bebingelele imantshi izolo.
UMancoba noMafikwana baboshwe ngempelasonto ngecala lokuhlela ukubamba inkunzi.
Bobabili bathe bazozimela futhi ngeke bayicele ibheyili.
Akucaci ukuthi ukuboshwa kwabo kuhlangene yini nesigameko sokudutshulwa kwamaphoyisa esiteshini saseNgcobo nokuboshwa kwamalungu ayisithupha aleli bandla.
UMancoba uchazwe wumphakathi njengongqondongqondo ohlelweni lokudutshulwa kwamaphoyisa aseNgcobo okwaholela ekubulaweni kwamaphoyisa amahlanu, kwathi emuva kwezinsuku ezimbili kwadutshulwa abasolwa abayisikhombisa emzini kaMancoba obuphinde ube yisonto.
Kubasolwa abayisikhombisa abadutshulwa ngamaphoyisa, abathathu ngabafowabo bakaMancoba.
Amaphoyisa aphinde abopha abasolwa abangu-10 kodwa abayisithupha badedelwa.
NgoMsombuluko abasolwa abane bavele eNkantolo yeMantshi eNgcobo ngecala lokubulala amaphoyisa amahlanu, elokuzama ukubulala iphoyisa ebelilaliswe esibhedlela emuva kokudutshulwa nozakwabo nelokubamba inkunzi ngesihluku.
Abanye abasolwa ababili bavele enkantolo ngamacala afana nawalaba abane.
Kulindeleke ukuthi ngoLwesine kuvele abasolwa abane enkantolo.
UMancoba kulindeleke ukuthi athweswe icala lokudlwengula, elokufundisa ngocansi nokuxhaphaza ngokocansi.
Ukuboshwa kwakhe kulandela uphenyo olwenziwe woKlebe okuhlanganisa namaphoyisa ezobunhloli lapho kwalandwa khona abesifazane nezingane abangaphezu kuka-100 emzini kaMancoba.
Ukhomishana wamaphoyisa, uGeneral Khehla Sitole, uveze ukuthi abanye besifazane abathathwa emzini kaMancoba babesetshenziswa njengezigqila zocansi.