Kuboshwe unesi osolwa ngokweba imishanguzo
UDEDELWE ngebheyili umhlengikazi wasemtholampilo wasePhoenix okuthiwa ubanjwe ephuma nemijovo nemishanguzo eyebiwe emtholampilo.
UMnuz Msizi Ngcobo ubevele eNkantolo yeMantshi ePhoenix izolo, wadedelwa ngebheyili kaR5 000.
Kuthiwa lo mhlengikazi ubanjwe ngoLwesihlanu emuva kokuseshwa onogada bakulo mtholampilo abamthole nemijovo nezinye izinsiza kusebenza ezebiwe.
Ube esemiswa ngokushesha emsebenzini waboshwa. Izolo inkantolo yeMantshi ePhoenix imdedele ngebheyili ukuze kuqhubeke uphenyo.
UNgqongqoshe wezeMpilo KwaZulu-Natal, uDkt Sibongiseni Dhlomo, uthe bayasamukela isinqumo sokuhlehliswa kwecala ukuze kuphenywe. Ubonge inkampani yonogada ebambe lo mhlengikazi ngomsebenzi wayo.
“Siyasamukela isinqumo senkantolo sokuthi kuqhutshekwe kuphenywe kabanzi bese icala lakhe lihlehlela u-Ephreli ukuze kubhekwe ukuthi lokho asolwa ngokuthi ukwenzile, ukwenze ngempela yini,” kusho uDhlomo.
Uthe uthole ngabaphathi balo mtholampilo ukuthi lo mhlengikazi usefake incwadi yokwesula emsebenzini. UDhlomo uthe noma beyamukela incwadi yakhe basazoqhubeka nophenyo lwabo lwangaphakathi futhi bazothi uma sebethole ubufakazi bese bebudlulisela kwiSouth African Nursing Council (SANC). Uthe benzela ukuthi kubhekwe ukuthi akukho yini akwenzile ukufaka lo mkhakha ehlazweni nokuthi akayiphoxanga yini iSANC njengoba athatha izifungo zokunakekela iziguli, hhayi ukweba imishanguzo.
“Kuzofanele kuphenywe ukuze nakwezinye izindawo lapho athi ufaka khona isicelo somsebenzi kwaziwe ukuthi unerekhodi elinjani,” kusho uDhlomo.
Uthe uma kushoda imishanguzo ezikhungweni zezempilo kubizwa ungqongqoshe ukuzophendula ngokuthi kungani imishanguzo ingekho.
Uthe ngeke kubizwe abantu abafana nalo mhlengikazi ukuthi bazophendula. Uqhube wathi kuwubugebengu ukuthi umuntu okulo mkhakha atholakale ebeka isikhungo esimeni sokungabi nemishanguzo engasiza iziguli ngoba ebona ukuthi kungcono antshontshe. Uthe ucabanga ukuthi akufani nomuntu otholakala nezinkwa ngoba elambile noma ekhala ngokuholelwa kancane.