UCele ufuna kuphenywe amasonto
UNGQONGQOSHE wamaPhoyisa kuleli uMnuz Bheki Cele usephakamise ukuthi aphenywe amabandla ngemuva kokubanjwa kwabanye abasolwa abathinteka esehlakalweni sokusocongwa kwamaphoyisa esiteshini saseNgcobo, e-Eastern Cape, bebhace esontweni.
Ekhuluma emngcwabeni wephoyisa elishone ngemuva kokudutshulwa izigebengu, uCaptain Dumisani Mhlanzi eMudeni ngempelasonto, uCele uthe ukhathazekile ngendlela amanye amabandla enza ngayo.
“Izinto okuthiwa zenzeka kuleli sonto laseNgcobo, iSeven Angels, zenza kube nesidingo sokuthi siwaphenye kabanzi amasonto ngoba kuyacaca ukuthi ziningi izinto ezenzeka kuwo eziphambene,” kusho uCele.
Uthe abayisi izingane emasontweni ukuthi ziyofuthwa ngama-doom ziphinde ziphuziswe ophethroli.
“Uma abantu sebedliswa utshani izimbuzi zizodlani?” Kubuza uCele.
Uthe ngokuphakamisa ukuthi kuphenywe amasonto akasho ukuthi awavalwe.
UCele uphawula kanje, sikhulu isikhalo emphakathini mayelana nemigilingwane eyenzeka kwamanye amasonto kuleli.
Ngenxa yemigilingwane eyenzeka kwamanye amasonto, uhulumeni uze wasungula iKhomishini evikela Inkolo, Izilimu namaSiko ephethwe nguDkt Thoko Xaluva-Mkhwanazi.
Le khomishini iphenya kabanzi ngezinto eziningi kubalwa nokuhlukunyezwa kwabazalwane emabandleni ngemuva kokuthola izikhalo.
Baningi abafundisi abadumile asebebizelwe kule khomishini, abanye babo banqaba nokuholele ekutheni kuze kumangalelwane.