Kuzophenywa okwenzeka kwiMDDA
IPHALAMENDE lizophenya abantu ngokwenzeka enhlanganweni iMedia Development and Diversity Agency (MDDA) emuva kokuvela kokuthi ayiphethwe kahle.
Lokhu kuvezwe nguMnuz Humphrey Maxegwana, uSihlalo wekomidi lezokuxhumana ePhalamende, izolo.
UMaxegwana uthe bebevakashele emahhovisi eMDDA, KwaZulu-Natal baphinde badlulela naseziteshini zomphakathi.
“Sithole ukuthi uhulumeni ufaka imali kwiMDDA efanele wukuxhasa iziteshi zomsakazo zomphakathi kodwa ayiwenzi umsebenzi wayo. Akukho okuhlonyulwa yiziteshi zomphakathi. Sizokwenza uphenyo ngebhodi leMDDA okuthiwa linamalungu aphula umthetho. Sizophenya njengoba senza kwiSABC,” kusho uMaxegwana.
Umbiko kaMaxegwana uveze ukuthi abasebenzi baseMDDA bakhathazekile ukuthi sekuphele iminyaka emibili bengenaso isikhulu esiphezulu.
“Ukungabikhona kwesikhulu esiphezulu kuholele ekutheni kubekwe abazobamba abafika nemithetho yabo engayithuthukisi inhlangano.”
Bakhathazekile nangokuthi izinhlelo zamaphephandaba nemisakazo yomphakathi azibhekelelwa kahle. “Kunamaphephandaba neziteshi zomsakazo eziphasiswe ngaphandle kokulandela imigomo efanele.”
Isinqumo sokuphenya iMDDA selama isicelo sobeyiPhini likaNgqongqoshe wezokuXhumana, uNksz Thandi Mahambehlala, ePhalamende sokuthi liyiphenye le nhlangano, asenza ezinyangeni eziyisithupha.
UNksz Mahambehlala wathola ukuthi ibhodi leMDDA liyagxambukela ekuphathweni kwenhlangano.
UDkt Mbuyiseni Ndlozi we-EFF uthe ibhodi leMDDA kufanele lihlakazwe kuqokwe elisha. “IMDDA ayiwaseki amaphepha neziteshi zomphakathi futhi asinalo ithemba lokuthi uNgqongqoshe omusha wezokuXhumana, uNkk Nomvula Mokonyane, uzoshintsha isimo. Wahluleka nokulungisa izinto ngesikhathi kunenkinga yesomiso. Asihambisani nokuqokwa kwakhe.”
UMnuz Willie Madisha weCope uthe iyabakhathaza indaba yeMDDA osekuphele iminyaka emibili ingenaso isikhulu esiphezulu futhi bazoyisukumela ngoba nabasebenzi bayo bazisholo bona ukuthi bakhathazekile.