Isexwayiso ngokujaha imali esheshayo yamabhanoyi
I-SOUTH African Banking Risk Information Centre (Sabric), ixwayisa abantu ngokutshala imali emabhanoyini.
Isikhulu esiphezulu seSabric, uNkk Kalyani Pillay, sikhiphe lesi sixwayiso izolo emuva kokuthola izikhalo emphakathini obuthi awusayitholi imali obuyitshalile.
UNkk Pillay uthe amabhanoyi amanje aseqoqa abantu ezinkundleni zokuxhumana athi abatshale imali encane ukuze babuyelwe yinzalo enkulu.
“Awukwazi ukutshala imali bese uthemba ukuthi uzobuyelwa yinzalo ephezulu. Uma kungachazwanga ukuthi imali izovelaphi kufanele ubone ukuthi yinto engekho leyo. Kufanele uqinisekise ukuthi inkampani otshala kuyona imali ibhaliswe ngokusemthethweni,” kusho uNkk Pillay.
Uthe kuyenzeka ukuthi izinkampani zibhaliswe ngokusemthethweni kodwa zingenzi lokho ezibhaliselwe kona ngakho kubalulekile ukuthi abantu benze ucwaningo ngaphambi kokufaka imali kuzo.
Nanka amasu azosiza ukuthi ubone ibhanoyi elibizwa ngePonzi Scheme:
Lapha inkampani ithembisa inzalo ephezulu ngokushesha Umnikazi wenkampani uba neziqu zomkokotelo. Inzalo ikhokhwa uma lisaqala bese ngokuhamba kwesikhathi abantu bangayitholi imali.
Umnikazi webhizinisi akathandi ukuchaza kahle ukuthi imali uyenza kanjani.
Umnikazi webhizinisi akatholakali kalula ocingweni futhi uyanyamalala uma sebebaningi abantu abangayitholi imali.
Nanka amasu azokusiza ukubona ibhanoyi elibizwa ngePyramid Scheme:
Lapha umnikazi webhizinisi uthembisa inzuzo enkulu uma ufaka abantu abaningi enkampanini.
Kuba nemali okufanele itshalwe bese abantu befuna abazongena ebhanoyini.
Kuba nezigaba ezihlukene zebhizinisi futhi uklonyeliswa ngokwesigaba esithile.