UMcCarthy uyoqhuba izifundo ze-Uefa
UKHALE ngokungafuni ukumosha imali umqeqeshi weCape Town City, uBenni McCarthy, echaza ngokubaluleka kokuthi iqembu limdedele ayoqedela izifundo zokuqeqesha e-Europe.
Ngempelasonto uMcCarthy ulifulathele leli wayoqhuba izifundo ze-Uefa Pro Licence. Ngenyanga edlule uthole i-Uefa A Licence.
I-Uefa Pro Licence yisona isicucu esiphezulu ongasithola kwezokuqeqesha.
“Ngesikhathi ngithatha umsebenzi, usihlalo wangincenga wathi ngizosithola isikhathi ngoba ngamtshela ukuthi ngizimisele ngokuqedela iPro Licence. Sengiphuthe izikhawu ezimbili, uma ngingaphuthwa yilesi ngizoxoshwa okusho ukumosheka kwemali nonyaka ngibe sengisondele ukuthi ngiqede. Yebo ngiyahamba ngiya eManchester, lapho sizoya kobuka umdlalo weManchester City neBasel weChampions League, okuwumunxa wezifundo zami. Ngikholwa wukuthi eqenjini sinabaqeqeshi abafanele abazoqhubeka nomsebenzi,” kusho uMcCarthy ekhuluma kwi-SS4.
Lokhu kusho ukuthi iCity kaMcCarthy izodlala umlenze wokuqala womdlalo weCAF Confederation Cup ngaphandle kwakhe.
Umdlalo useMozambique lapho iCity izotholana neCosta de Sol kusasa ngo-7 ebusuku. Izintambo zizobe zibanjwe yiphini lakhe uVasili Manousakis.
Okhulumela iqembu uJulian Bailey uqinisekisile ukuthi uMcCarthy akekho.
“Uzoze abuye ngoLwesihlanu ngaphambi komdlalo wethu ne-Orlando Pirates. Uzophinde ahambe elinye isonto ngo-Ephreli,” kusho uBailey.
ICity izobhekana nePirates koweLast 16 yeNedbank Cup ngoMashi 14 eCape Town Stadium ngo-7.30 ebusuku.
Okungenani uMcCarthy ushiye iqembu libuyelwe ukuzethemba lishaya iChippa United ngo 2-0 emdlalweni we-Absa Premiership ngempelasonto. Amagoli ashaywe uLyle Lakay no-Ayanda Patosi obekade agcina ukudlala. Bese liqhube imidlalo emine yeligi lihlulwa.
“Khona sesiphefumulile. Ngiyambongela uTeko (Modise) ngendlela adlale ngayo. Amava akhe asebenzile ngoba bebesicindezele futhi bemlandela yonke indawo kodwa wazithola izikhala. Umfanele umklomelo womdlali ovelele. NoPatosi ngiyamjabulela ngemuva kokuthwala kanzima, izinto zingahambi kahle kodwa ukuzimisela kwakhe ejimini kwenze ngagembula ngamdlalisa. Kuyajabulisa uma uzibona izithelo zalokho. Ngiyafisa aqhubeke kanje ngoba uma ekhona uyakwazi ukuliphilisa iqembu futhi uyalishaya negoli,” kusho uMcCarthy.
n Khona manjalo iSuperSport United izodlala nePetro le Luanda yase-Angola koweConfederation Cup namuhla ngo-5 ntambama. IBidvest Wits izobhekana neDe Agosto yase-Angola koweCAF Champions League kusasa ngo-5 ntambama.