Abazimisele ngokudayisa uNdlovu
I-MARITZBURG United ayinazo izinhlelo zokudayisa umdlali wayo ovuthayo uSiphesihle “Mbesuma” Ndlovu.
Ngeledlule uNdlovu uqokwe njengomdlali obevelele kuJanuwari. I-Team of Choice isizakhele igama ngokudayisa abadlali bayo abamqoka abasuke benza kahle.
Muva nje leli qembu lisanda kudayisa u-Evans Rusike othengwe yiSuperSport United. Phambilini lidayise u-Onismor Bhasera, Rudolf Bester, Mohammed Awal, Rheece Evans, Ryan Moon noCuthbert Malajila.
UFarook Kadodia ongusihlalo weTeam of Choice utshele leli phephandaba ukuthi akazimisele ngokufaka uNdlovu endalini. Lo mdlali useqalile ukuheha iso lamaqembu amakhulu.
Njengamanje kuvela ukuthi ufunwa yiBidvest Wits neMamelodi Sundowns abangawuvali umlomo ngekhono lakhe.
“UNdlovu siqale ukumbona ukuthi unekhono esadlalela inkulisa yeqembu. Besingafuni ukumjaha. Usebenza kanzima futhi seneme ngendlela eza ngayo. Kumele senze isiqiniseko sokuthi simluleka ngendlela efanele njengomdlali osemncane. Usasalelwe yisizini eyodwa noma amabili lapha kwiMaritzburg ukuze akhule. Uneminyaka engu21 ngakho ngeke sijahe ukuxoxa ngendaba yokumdayisa,” kusho uKadodia.
I-Team of Choice yenza kahle kulezi zinsuku. Leli qembu lihlezi endaweni yesine ngamaphuzu angu-35 emidlalweni engu23. Lihlukaniswe amaphuzu ayisishiyagalombili neMamelodi Sundowns eqhwakele kwi-log.
Kwi-last 16 yeNedbank Cup lizotholana neRoyal Eagles egijima kwiNational First Division, ePrincess Magogo Stadium, KwaMashu, ngeSonto ntambama.
“Kumqoka ukuthi senze isiqiniseko sokuthi siyamvikela kwabezindaba uNdlovu. U zibeke phansi futhi angingabazi ukuthi usazohlomula ngezinto ezinkulu ebholeni,” kusho uKadodia.