Ngijabule ngefomu yami, kusho uMemela
IQHAWE le-Orlando Pirates, uLuvuyo Memela, alifuni kulingene ekhanda ukwenza kahle emidlalweni esanda kudlalwa yaleli qembu osekuholele ekutheni lishisise umbango wesicoco se-Absa Premiership.
I-Pirates ikhombise ukulangazelela ukuwina isicoco seligi ngesikhathi ibukisa ngeKaizer Chiefs iyihlula ngo 3-1 ngempelasonto. UMemela uphenduke iqhawe lePirates, eshaya amagoli amabili esuka ebhentshini. IBucs isisele ngamaphuzu amane kwiMamelodi Sundowns ezihola phambili ngawu-43 esicongweni se-log. ISundowns isazobambeka emidlalweni yeCAF Champions League.
“Ngijabule ngefomu yami kodwa lokho angifuni kungingene kakhulu ekhanda. Lapha eqenjini wonke umuntu uyawashaya amagoli, wonke umuntu uyawakha. Ngibhekane nobunzima ezikhathini ezedlule ngilimala. Kodwa ngibonga uMdali ngokuthi ngibuye ngiqhubeke,” kusho uMemela.
“Ngijabule ukushaya amagoli amabili kowabakhaya wokuqala selokhu ngafika kwiPirates. Ngeneme ngokuthi siwinile, kufanele siqhubeke nokusebenza kanzima. Noma ubani odlalayo usebenza kanzima, siyasizana.”
Umqeqeshi wePirates, uMilutin “Micho” Sredojevic, ucele uMemela ukuthi angaziphakamisi njengoba esefomini wathi uma bukhona ubulungiswa uzoba sesikwatini seBafana Bafana esizomenyezelwa ngokuzayo.
UMemela, ohlulwe amanye amathuba okushaya amagoli koweChiefs, uphunyukwe yithuba lokuqopha umlando wokuba ngomunye wabadlali abashaye amagoli amathathu emdlalweni wabakhaya. Selokhu kwagcina ngoJerry Sikhosana ngo-1996 ezenzela kuBrian Baloyi emdlalweni owandulela owamanqamu weBobsave Super Bowl eFNB Stadium.
“Bengifuna ukushaya igoli lesithathu. Bengazi ukuthi kowabakhaya akekho osashaye amagoli amathathu muva nje. Angazi kahle ngengwazi uJerry Sikhosana kodwa bengifuna ukushaya igoli lesithathu,” kusho uMemela.
IPirates izobhekana neCape Town City emdlalweni weNedbank Cup Last 16 eCape Town Stadium ngoLwesithathu oluzayo.
Imidlalo yeNedbank Cup Last 16:
NgoLwesihlanu: AmaZulu FC v Ubuntu Cape Town (Princess Magogo Stadium, 8pm)
NgoMgqibelo: Baroka FC v Steenberg United (Peter Mokaba Stadium, 3.30pm); Free State Stars v Chippa United (Goble Park, 3.30pm); Kaizer Chiefs v Stellenbosch (Moses Mabhida Stadium, 8.15pm)
NgeSonto: Bloemfontein Celtic v Richards Bay (Dr Molemela Stadium, 3.30pm); Royal Eagles v Maritzburg United (Princess Magogo, 3.30pm);
NgoLwesibili: Mamelodi Sundowns v EC Bees (Lucas Moripe Stadium, 7.30pm)