UHeric ubekelwe imigomo ethile kwiChipp
UBEKELWE umgomo wokuhamba ibanga elide kwiNedbank Cup aphinde aqinisekise ukuthi uyifaka kwiTop 8 iChippa United umqeqeshi wayo omusha uVladislav Heric.
Uthathe umsebenzi ngokugcwele ngoMgqibelo emuva kokukhonjwa indlela kukaTebogo Moloi. Lokhu kushiwo uSiviwe “Chippa” Mpengesi, usihlalo weChilli Boys. Uthe ulande uHeric ngoba uyawazi amagalelo akhe. Usayine inkontileka ezophela uma kusongwa isizini.
UHeric usevumbuka kwiChippa nje, usanda kuba sezindabeni ngesikhathi egoloza ukuxoshwa kwiRoyal Eagles edlala kwiNational First Division (NFD). Isolezwe litshelwe ukuthi uHeric ukhonjwe indlela benomkhaya wakhe uKostadin Papic. Indawo yabo izothathwa nguRoger Sikhakhane.
Kuthe sekusesithangamini nabezindaba kuzodlala iNedbank emasontweni edlule, kwabonakala ngoHeric ezomela i-Eagles. Uthe uma ebuzwa ukuthi kwenzeka kanjani ukuthi azomela i-Eagles okuthiwa imxoshile waveza ukuthi uyalelwe wumphathi wakhe, uShaun Mpisane, ukuthi akaye kulesi sithangami nabezindaba. Sekuyinto eyaziwayo ukuthi uSikhakhane nguyena opheka i-Egles manje futhi yenza kahle esandleni sakhe.
Ekhuluma ngoHeric (50) uMpengesi uthe: “Besifuna umuntu olaziyo iqembu nezifiso zalo. Ungumqeqeshi ofanele ngoba uyena futhi osikhuphulele lapho kunoju khona ngo-2014. Ukwenze lokhu kusasele imidlalo emine okuyinto engejwayelekile kwiNFD. Angizange ngicabange kabili. Siyamamukela. Sifuna ukuhamba naye ibanga elide kwiNedbank kanti nesifiso sokuqeda kwi-Top 8 sisekhona. Okwethu wukumnika zonke izinsiza azidingayo. Siyazi uzosijabulisa ekupheleni kwesizini.”
Esandleni sikaMoloi iChippa ibisaqhubeka nokudlala ibhola elihle kodwa imiswe kabi wukudlala ngokulingana. IChippa kaMoloi ibiyinqoba imidlalo kanti ukhonjwa indlela nje isendaweni ehloniphekile kwazise isondelene neTop 8. UHeric uzoqala ngokulungiselela oweNedbank Cup osekuhambeni kuFree State Stars.