UJohnson akafuni ukugilwa wuBuntu
AKAFUNI nokuyizwa umqeqeshi weMaZulu FC, uCavin Johnson, eyokugilwa yiqembu elidlala kwiNational First Division, Ubuntu FC, azobhekana nalo kwiNedbank Cup Last 16.
Umdlalo useKing Zwelithini Stadium, eMlaza, ngoLwesihlanu ngo-8 ebusuku.
UJohnson ubekhuluma ngemuva kokuthi ezakhe zithelwe phansi yiMamelodi Sundowns ngo 3-1 emdlalweni we-Absa Premiership obukuyona le nkundla ebigcwele ngempelasonto.
Uthe ujabule ngendlela iqembu lakhe elidlale ngayo esiwombeni sokuqala kodwa wathi kuzomele babuyele emuva bayolungisa amaphutha ngaphambi kokubhekana noBuntu.
Ubuntu bubalwa namaqembu abalekela izembe kwi-log yeNFD.
Nokho ngempelasonto buuthole amaphuzu amathathu buhlula uMthatha Bucks ngo 1-0. Ubuntu bakhipha iPolokwane City ngo 3-2 kwiLast 32.
UMthatha Bucks, nawo odonsa kanzima kule ligi, wanikeza Usuthu ubunzima kwiLast 32 yeNedbank Cup.
EzikaJohnson zadlula kumaphenathi ngemuva kokuthi uMthatha ungazange uzibeke phansi, ubuya ekugcineni esikhathini esengeziwe.
“Kumele sibancome abadlali ngendlela abadlale ngayo nokuzinikela kwabo. Okungenani bekumele bathole iphuzu. Ukuba sezingeni lokuncitisana neqembu elihamba phambili kwi-log futhi elingompetha base-Afrika kusho ukuthi igama leqembu liyakhula futhi nabadlali baya ngokuba ngcono.
“Okwethu manje wukubuyela emuva siyolungisa amaphutha bese sifaka iqembu eliqinile elizobhekana noBuntu. Kuzomele sihlale siqaphile ngoba lapha ayisebenzi indaba yomthetho ka-Under 23. Asifuni ukuzibona esimeni esibhekane naso kuMthatha Bucks,” kusho uJohnson.
Iqembu elizodlula lapha lizongena kuma-quarterfinal eNedbank Cup. Ngo-2010 Usuthu lwahamba laze lwahlulwa yiBidvest Wits ngo 3-0 kowamanqamu kuvulwa iSoccer City Stadium.