Baphumela obala ngokuhlamuka iMabhida
AMAQEMBU aKwaZulu-Natal aphumela obala ngesinqumo sawo sokugabha iMoses Mabhida Stadium emidlalweni emikhulu.
IMabhida bekubhekwe ukuthi isingathe imidlalo emikhulu yeLamontville Golden Arrows naMaZulu kodwa la maqembu ayishova ezinkundleni zasemalokishini.
Usuthu belubhekene neMamelodi Sundowns ngempelasonto eKing Zwelithini Stadium, eMlaza kowe-Absa Premiership.
AmaZulu azophinde abhekane ne-Orlando Pirates eKing Zwelithini Stadium ngo-Ephreli 15 emdlalweni weligi.
Leli qembu elinomlando obambekayo ebholeni lidlale ngokulingana ngo 0-0 neKaizer Chiefs eKing Zwelithini ngonyaka odlule emdlalweni weligi.
I-Arrows nayo yenze into efanayo kwazise ngoMashi 17 izotholana phezulu nePirates ePrincess Magogo Stadium, KwaMashu ngo-8.15 ebusuku. Ngo-Ephreli 24, iChiefs izodudulana ne-Arrows eMagogo ngo-7.30 ebusuku emdlalweni weligi. I-Arrows vele isidlalile neSundowns eMagogo. ISundowns yanqoba ngo 1-0.
UQedi Dlamini oyimenenja yoSuthu noGordon Masondo oyisikhulu esiphezulu kwi-Arrows baphumele obala ngezizathu ezenze bahlamuka iMabhida.
“Isinqumo sokudlalela yonke imidlalo yethu yasekhaya eKing Zwelithini sisithathe ngaphambi kokuthi kuqale isizini. Sifuna ukuhambisa imidlalo kubantu emphakathini. Inkundla yethu yasekhaya sifuna kwaziwe ukuthi yiKing Zwelithini. Isibalo esimumathwa yile nkundla siyasenelisa njengeqembu. “Okunye esikubhekile wukukhulisa iqembu AmaZulu nokwandisa isibalo sabalandeli ababukela imidlalo yethu. Okwamanje seneme ngendlela esesekwa ngayo eKing Zwelithini. Le nkundla sihlele ukusebenzisa yona nangesizini ezayo. Izindleko zaseMabhida ziyashaya ephaketheni. Nakanjani singathanda ukudlala eMabhida kodwa sifuna ukuqale sigcwalise iKing Zwelithini. Uma sesikuzuzile lokho sesingacabanga ngokuya eMabhida,” kusho uDlamini.
NoMasondo ukubeke kwacaca ukuthi bafuna ukukhulisa iqembu njengoba bedlala KwaMashu.
“Sikhethe ukuhambisa imidlalo yethu emalokishini ngenxa yokuthi sifuna ukulakha kabusha iqembu. Abantu abeseka iqembu bagcwele emalokishini ngakho kumele siqale khona ukwakha. Lokho akusho ukuthi asinabo abantu emadolobheni. Akukho okubi ngeMabhida. Njengamanje siyakha futhi sifuna abantu basibekezelele.
“Iqembu lisanda kubuya esigabeni esikhulu ngemuva kokugawulwa yizembe. Okwamanje awukho umdlalo wethu esisadayise kuwona wonke amathikithi kule esiyidlala emalokishini. Ngakho kusamele sifundise abantu ukugcwalisa lezi zinkundla bese sicabanga ngokubuyela eMabhida ngoba imumatha isibalo sabalandeli abaningi. Sisalwa nokubuyisa abalandeli bethu ngoba abanye balishiyile iqembu sidliwa yizembe yize kukhona abawe nathi,” kusho uMasondo. UVusi Mazibuko oyimenenja eMabhida ukusho kwagcwala umlomo ukuthi abadikibele ngokuthi i-Arrows naMaZulu bakhethe ukudlalela imidlalo yabo yasekhaya emikhulu ezinkundleni ezisemalokishini.
“Sekunohlelo olusha lokuphatha izinkundla. Izinkundla zonke sezingaphansi kukamasipala. Izinkundla ezingaphansi kwethu yiSugar Ray Xulu Stadium, King Zwelithini Stadium, Princess Magogo Stadium, Chatsworth Stadium neMpumalanga Stadium. Ngakho asiphathekile kabi ngokuthi la maqembu akhethe ukudlalela eMlaza naKwaMashu ngoba izinkundla zingaphansi kwethu. Yebo singathanda ukuthi kudlalwe kuzona zonke izinkundla kodwa siyaxoxa namaqembu,” kusho uMazibuko.