Okungasiza abazali ukuze izingane zidle kahle
ININGI lezingane likhuluphele ngokweqile futhi lidla ukudla okugcina sekuzidalela izinkinga zokuthola izifo ezidalwa yindlela eziphila ngayo. UNksz Monique Piderit ongungoti wezokudla aphinde abe yilungu lesigungu esaziwa ngeYoghurt Panel uveze okungenziwa abazali ukusiza izingane zidle ngendlela efanele.
Thengani ukudla ndawonye bese nikupheka ndawonye
Kuhle ukuhamba nezingane uma uyothenga ukuze zifunde ukukhetha ukudla okumele kuthengwe. Kubalulekile nokuxoxa nazo ngezinhlobo ezahlukene zokudla nangobuhle nobubi bazo. Pheka nazo uzidedele zithathe izinqumo ngezithako ezisetshenziswa uma kuphekwa. Banike abakufunayo Akusizi ukuphoqa izingane ukuthi zidle ukudla ezingakuthandi. Kuhle ukuzinika ukudla okwahlukene kodwa uqikelele ukuthi awuhlezi uzinika ukudla ezingakuthokozeli. Sebenzisa imibala nemihlobiso ekudleni
Ezinganeni ibalulekile indlela ukudla okuqhamuka kuyiyona. Uma kuhlotshisiwe noma kubekwe ngendlela ekwenza kubukeke kahle ziyakuthakasela kube lula ukuthi zidle.
Zivumele ukuthi zidle izicoficofi ezithanda ukuzidla
Abazali abaningi bayazisola uma benika izingane izicoficofi ezizithandayo kodwa bakhohlwe ukuthi nabo kuba nesikhathi lapho bedla ezithandwa yibona. Ukuphoqa izingane ukuthi zigweme izinhlobo ezithile zokudla kwenza zifise ukuzidla nokwenza zizidle kakhulu uma sezizithola. Qinisekisa ukuthi noma uyinika izicoficofi zihambisana nokudla okunempilo.
Khuthaza ingane ukuthi yenze okulandelayo:
Ukudla izithelo nemifino, ukuphuza ubisi, amasi neyogathi zonke izinsuku, ukudla isidlo sasekuseni, ukuphuza amanzi, ukudlala nokuzivocavoca.