Kubi koshaywe wumphezulu enkundleni
KUSEKUBI esibhedlela kumdlali weMaritzburg United, uLuyanda Ntshangase, oshaywe wumbani ngesikhathi iqembu leMultichoice Diski Challenge (MDC) lidlala owobungani ngoLwesine olwedlule.
Izolo usihlalo we-United, uFarook Kadodia, uthe basayicela imithandazo ezosiza umdlali ukuthi alulame njengoba esaphefumula ngemishini esibhedlela.
“Kade ngiyile kombheka izolo (ngeSonto) sathola ukuthi usaphefumula ngamapayipi. Esikubhekile manje wukuthi akwazi ukuziphefumulela ngokwakhe. Uma odokotela kukhona okusha abasitshela khona sizokhipha isitatimende njengeqembu. Siyayidinga imithandazo ukuze alulame,” kusho uKadodia.
Uthe isigameko senzeka ngoLwesine bedlala owobungani enkundleni engaphandle kwaseHarry Gwala Stadium lapho kwaba khona imvula nombani.
Umqeqeshi weTeam of Choice, uFadlu Davids, uyena oveze lezi zindaba ngempelasonto ngesikhathi ephawula kwithelevishini ngemuva komdlalo wabo neSuperSport United we-Absa Premiership.
Umdlalo uphele ngo 0-0 okuyiphuzu elibeke leli qembu laseMphithi endaweni yesine kwi-log ngamaphuzu angu-34.
“Ngiyaziqhenya ngendlela abadlali bami abadlale ngayo ngenxa yesimo esidlule kusona kulezi zinsuku ezimbalwa. Akulula ukubona uzakwenu eshaywa wumbani eyolala esibhedlela. Siyamkhulekela, siyamcelela imithandazo. Siyamdinga ukuthi alulame, sifuna ukumbona enkundleni. Sidlalile yize kade kungelula sakwazi ukuthola umphumela. Vele bengingalindele ukuthi abadlali bami babe nomfutho njengasemihleni kodwa emuva sikwazile ukuthi siqine,” kusho uDavids.
Kwenzeka lokhu emasontweni edlule iqembu belisanda kulahlekelwa wumlandeli wokuqina, uDavids ambize ngoThandeka.
Kuyona le sizini i-United ishonelwe umdlali wayo uMlondi Dlamini engozini yemoto.
Ngo-2016 kwashona uMondli Cele engozini yemoto. Kukhona konke lokhu kuzomele uDavids nabadlali bakhe baqine njengoba ngeSonto kumele babuyele enkundleni ukuyobhekana neRoyal Eagles emdlalweni weLast 16 Nedbank Cup ePrincess Magogo Stadium ngo-3.30 ntambama.