Umphumela oncomekayo iBanyana idlala neKorea DPR
IBANYANA Banyana isethubeni lokuqeda endaweni engcono kwiCyprus Cup kunesike yayithola eminyakeni edlule ngemuva kokungashaywa emidlalweni yamaqoqo.
Izolo ibambane ngo 0-0 neKorea DPR okuwumphumela oncomekayo uma kubhekwa ukuthi leli lizwe likleliswe endaweni ka-11 emhlabeni. IBanyana iyibambe endaweni ka-54.
Emdlalweni wokuqala kaGroup C leli qembu eliphekwa uDesiree Ellis libambane ngo 0-0 neSlovakia kwathi kowesibili lashaya iHungary ngo 1-0.
Le miphumela ilinikeze amaphuzu amahlanu, okusho ukuthi ngoLwesithathu emdlalweni wokugcina womqhudelwano, lizobe libanga indawo yesihlanu noma eyesithupha.
Okwesithupha iBanyana idlala kwiCyprus Cup. Eminyakeni edlule ithole indawo yesithupha (ngo-2009), yalala eyesishiyagalombili ngo-2010. Ngo-2012 nango-2015 iqede endaweni yeshumi, ngo2013 yalala kweka-11. Umqhudelwano udlalwa ngamazwe angu-12.
Iqembu lika-Ellis likhombise ukuqina emuva njengoba lingakangenelwa yigoli kodwa kufanele ukuthi uzokhala ngokungasetshenziswa kwamathuba amagoli.
Emdlalweni wayizolo bebengawantshontsha amaphuzu agcwele. UJermaine Seoposenwe uyeke ukuphela kwethuba elicacile elitholwe iBanyana eshaya into ephume eceleni engasekho unozinti. Amanye akhiwe abephelela ezandleni zikanozinti weKorea DPR.
U-Ellis wenze izinguquko eqenjini lakhe. Emizameni yokuthola igoli ubonakale efaka uNoko Matlou emsebenzisa njengomgadli.
UMatlou wayengalibheki ipali ngaphambi kokuthi owayengumqeqeshi uVera Pauw amshintshele ekubeni umdlali wasemuva.
Lona bekuwumdlalo wakhe wokuqala kulo mqhudelwano. Omunye othole ithuba nguNompumelelo Nyandeni.
Eqenjini eliqale umdlalo u-Ellis ubophele uKaylin Swart emapalini. Emdlalweni wokuqala kwakuvimbe u-Andile Dlamini, kowesibili kwadlala uRoxanne Barker.
“Silapha ukuzozicijela imidlalo yokuhlunga esizoba nayo ngo-2018 ngakho sifuna ukunikeza bonke abadlali ithuba ukuze sazi ukuthi bazosinikani uma sesifuna abazosisiza,” kusho u-Ellis kwi-Safa.net.
NgoJuni iBanyana izodlala eyokuhlungela i-African Women Championship. Uma iya kulo mqhudelwano ongoNovemba eGhana, izobe iyolwela ukuthola indawo kwiNdebe yoMhlaba ka-2019.