Uthuthuva kudlala amaProteas ne-Australia
UKUXABANA kwabadlali abayizithandwa emazweni abo okunguQuinton de Kock wamaProteas noDavid Warner we-Australia kwenze yaphenduka yaba muncu iwini yama-Aussies kwiTest yokuqala abebeyigijima neNingizimu Afrika eKingsmead, eThekwini.
Kuthathe i-Australia amabhola angu-22 ukuba iwine iTest yokuqala ngosuku lwesihlanu. Igcine inqobe ngama-run angu118 kulo mdlalo. Nabenze kahle njengo-Aiden Markram wamaProteas noMitchell Starc we-Australia agcine engasanakiwe amagalelo abo kepha kwagxilwa kule ngxabano ethathwe yiCCVTV yaseKingsmead.
Okubonakala kule video nguWarner eshabasheka ebheke kuDe Kock obebhetha. Lokhu kwenzeke ngesikhathi abadlali sebephuma beyophuza itiye ngeSonto obekungusuku lwesine lweTest.
Yize kungacaci ukuthi yini imbangela yokuthi uWarner afune ukubamba uDe Kock ngamawashingi kepha ngemuva komdlalo ukaputeni we-Australia uSteve Smith uthe yi-wicketkeeper yamaProteas esuse uthuthuva.
“Ngiyavuma nathi siyakhuluma uma sisenkundleni kodwa okushiwo uDe Kock bese kungaphezulu. Angimsoli uWarner ngendlela enze ngayo ngoba nami angazi ukuthi bengizokwenzenjani ukuba okushiwo kuyena bekubhekiswe kimina. Yebo akumnandi uma abadlali bephuma esandleni kodwa lesi simo besingagwemeka,” kusho uSmith.
Abazithola zishisa bathi ngesikhathi umdlalo uqhubeka bekuvele kujikijelwana ngamazwi alumelayo kwaze kwafika isikhathi lapho uDe Kock edelele khona uWarner ngonkosikazi wakhe. Akuveli ukuthi utheni lo mdlali waseNingizimu Afrika kodwa ngokwe-video yaseKingsmead, ukube ubengekho u-Usman Kawaja ngabe babambane ngezandla abadlali. ICricket Australia isishilo ukuthi iphatheke kabi ngalesi sigameko futhi bazolubhekisisa lolu daba ngoba ingxabano ayinandawo kulo mdlalo. Le nhlangano ithe isahlanganisa ubufakazi. NeCricket South Africa (CSA) ikhiphe esayo isitatimende ikhala ngokuphoxeka kwayo ngokwenzekile.
Ukaputeni wamaProteas uFaf du Plessis ukhale ngokuyeka amathuba abawatholile ikakhulukazi ngebhethi kodwa wancoma abazivezile ukuthi sebekulungele ukuyenza eyabo indawo kumaProteas njengoMakram.
Sisekuzo ezezinxushunxushu zalo mdlalo, uNathan Lyon ubekwe icala yi-ICC kulandela ukubeka kwakhe ibhola phezu kuka-AB de Villiers abeqeda ukumkhipha nge-run out. Uzohlawula uhhafu womholo wakhe womdlalo kanti nendlela ajabule ngayo uWarner ebusweni bukaMakram (ngesikhathi esifanayo) isazocutshungulwa yi-ICC.
I-Test yesibili iyaqala ngoLwesihlanu eSt Georges Park, ePort Elizabeth.