Kubhimba uhlelo kumdlali wonyaka kwiPSL

KUSINDA kwehlela kwiPSL Player of the Year yangesizini edlule, uLebogang Manyama, okuze kube yimanje lisayeqa ikhona futhi ingalimele ijezi eqenjini lakhe laseTurkey, iKonyaspor.

Okwenza isimo salo mdlali obehola iCape Town City njengesibani singashintshi, wukuthi iqembu lakhe lilokhu liqhubeke njalo nokuba ukudla kwenduku njengoba kuphinde kwenzeka likhala ngaphansi ngo 1-0 kwiYeni Malatyaspor okulishiya kunombolo-16 kwi-log. Akakaze adlale kulo nyaka.

Zimbi izindaba eTurkey nje, zimhlophe eNetherlands lapho uThulani Serero ezibuyisele khona zishisa izinduku ngokusiza iVitesse inqobe ngo 3-2 kwi-Ajax Amsterdam eyamkhomba indlela. Bese kungumdlalo ka-20 uqalwa uSerero kule sizini njengoba inqoba nje.

Le wini ibeke iVitesse endaweni yesithupha kwi-log kanti sekusele imidlalo eyisishiyagalombili ukuthi isizini iphele.

Akazange adlale umngani kaSerero okunguKamohelo Mokotjo weBrentford edlala kwiChampionship yase-England. Bekumele badlale neCardiff City kodwa wahlehliswa umdlalo ngenxa yesimo sezulu ebesingesihle.

U-Andile Jali omunye umdlali wakuleli okumhambela kahle eBelgium. Ubedlala kule mpelasonto obese kungumdlalo ka-24 weligi. Banqobe ngo 3-2 kwiGenk esendaweni yesine. Sekusele umdlalo owodwa ukuthi uJali aqede isizini yakhe neKV Oostende. Ayidlalanga iDinamo Bucuresti yaseRomania edlalelwa nguMay Mahlangu. Kuthiwe ayidlali ngoba ilungiselela owenkomishi onamuhla ebusuku neCraiova.

E-France, uKeagan Dolly uqhubekile nokukhuhla ibhentshi ngesikhathi iMontpellier idlala ngokulingana (obese kungokwesithathu kulandelana) ne-Olympique Lyon. Nakuba bedlale ngokulingana kodwa ezikaDolly zisendaweni ekahle yokuzifaka kwi-Europa League.

Uwudlale wonke oweLille, uLebo Mothiba yize ehlulekile ukusiza leli qembu likhala ngaphansi ngo 2-1 kwiNice.

Ubengabonwa noLebohang Phiri kwiGuingamp inenebulwa yi-Angers ngo 3-0. NakuBongani Zungu kwenzeke okufanayo eqiwa yijezi okulandelwe ukuthi iqembu lakhe i-Amiens lishaywe yiRennes ngo 2-0.