Injabulo kohlabane koka-Asidlale
UBABAZA amandla kaNkulunkulu, uMnuz Phiwayinkosi Ndlovu, ohlomule ngoR15 000 eshaya emhloleni ngokuqagela imiphumela yemidlalo yangempelasonto edlule ye-Absa Premiership emqhudelwaneni weSolezwe, i-Asidlale.
UNdlovu (37) waseShowe uthe ubesemincele umphumela womdlalo obuphakathi kwePlatinum Stars neFree State Stars okuyiwona abengawubonanga. I-Free State inqobe ngo 2-1.
“Ngithole isiqiniseko sengithola ucingo olushoyo ukuthi yimina engiwinile. Indlela engijabule ngayo angazi ngingathini ngoba angisiyena nomuntu okhonze ukukhuluma. Ngibonga ongaphezulu nawo umncintiswano u-Asidlale,” kusho uNdlovu ngesikhathi esemahhovisi eSolezwe izolo.
Le nsizwa eshadelwe enomntwana oyedwa, ayikasebenzi ngokugcwele, ibamba amatoho. Ithe ukuthola le mali kuzolekelela ezidingweni zakubo.
“Izosiza kakhulu le mali esimeni sasekhaya. Kunezinto ezidinga ukulungiswa njengoba wazi thina sibuye sikholelwe emasikweni.
Uma ungasenabo abazali uthola ukuthi ekhaya babheke wena. Bahlezi bekubikela ngezinkinga ezikhona, ugcina usuphathwa yikhanda ungazi uzokwenzenjani. Yingakho ngithi ngibonga uNkulunkulu ngokungihambela phambili,” kusho yena.
Ubengaqali ukudlala i-Asidlale futhi usazimisele ngokuqhubeka.
“Uma usekhona nje umncintiswano ngizolokhu ngiqhubeka ngifaka nami,” kusho uNdlovu.
Njengoba ngempelasonto bekuhlangene abakhaya baseSoweto, uNdlovu uthe ubengenalo uvalo ngokufaka imali yakhe kwi-Orlando Pirates. I-Bucs inqobe ngo 3-1 ishaya iKaizer Chiefs.
“Ngiwumlandeli weMamelodi Sundowns. I-Pirates ngiyikhethe ngoba idlala kahle kulezi zinsuku,” kuphetha uNdlovu.