Ingozi edlule namalungu omndeni
KUBHUBHE abantu abayisikhombisa, abayisithupha kubona okuthiwa ngabomndeni owodwa, ngesikhathi kushayisana imoto encane neveni emgwaqweni uR75, phakathi kweBergville neHarrismith izolo. Bonke abashonile abayisithupha ngabesifazane bese kuba yingane encane eyintombazane.
Kuthiwa oyedwa oshonile ubehamba ngeveni nabanye abane abasindile kanti laba abanye bebehamba ngemoto encane.
Okhulumela abezimo eziphuthumayo KwaZulu-Natal, uMnuz Robert McKenzie, uthe akukho abebengakwenza njengoba bese lidume ledlula ngesikhathi befika endaweni yesigameko.
“Kushone ujuqu abantu abayisikhombisa engozini yeveni nemoto encane. Bashone bonke abebehamba ngemoto encane, kwabebesevenini kusinde abane. Sibalaphile base bephuthunyiswa ezibhedlela,” kusho uMcKenzie.
Isolezwe lithole ngomthombo ocele ukugodlwa igama ukuthi abalimale emotweni encane ngabandawonye, bebesuka eGoli beze eKZN yize kungaziwa ukuthi bebezokwenzani.
Okhulumela uphiko lomgwaqo iRTI, KwaZulu-Natal, uNkk Zinhle Mngomezulu, uthe basazokhonjwa abalimalile.
“Abebehamba ngemoto encane enezinombolo zaseGauteng bashone bonke. Bekukhona nengane encane nabesifazane abahlanu. Basazokhonjwa ukuze sazi ukuthi ngabomndeni owodwa ngempela yini,” kusho uNkk Mngomezulu.
Okhulumela amaphoyisa KwaZulu-Natal, uCaptain Nqobile Gwala, uthe kuvulwe amacala okubulala ngokungenhloso. Kusaphenywa ngembangela yengozi.
Kwesinye isigameko, kushone oyedwa izolo phakathi kwaseHarding naseZingolweni ngesikhathi kushayisana amaloli amabili. Omunye uphuthunyiswe esibhedlela kukubi.
Umgwaqo uN2 kuphoqeleke ukuba uvalwe isikhashana ukuze kuhlengwe abebekule ngozi. Kuyaphenywa ngengozi kanti kuvulwe icala lokubulala ngokungenhloso.