Uyabalisa owaMaZulu ohlushwa wukulimala
UBALISA ngokubanjezelwa wukulimala uThembela Sikhakhane ofike kuMaZulu ethwelwe ngeqoma ukuthi uzogila izimanga kwazise ubesuka eqenjini elithathwa njengelikhulu.
Izolo emini lo mdlali wasoLundi uhlale phansi naleli phephandaba ngesikhathi beqeda ukuzilolongela umdlalo abazowudlala ne-Ubuntu Cape Town abazobhekana nayo kwiLast 16 yeNedbank Cup ngoLwesihlanu, ngo-8 ebusuku eKing Zwelithini Stadium.
USikhakhane usayine kuMaZulu maphakathi nonyaka odlule. Kuthiwa ubolekisiwe esuka kwi-Orlando Pirates kuze kuphele isizini. Akazange nokho aphumele obala ngenkontileka yakhe kodwa ukulimala okwahlukene osekumhlalise isikhathi kumenza asikhalele isikhathi sakhe.
“Kungibulele kakhulu ukulimala ngoba ngifike ngiwumdlali okubukeka sengathi usenesipiliyoni ngenxa yamaqembu esengidlule kuwona. Ngilimale kabi ngidlala kahle kuncoma wonke umuntu. Sinomqeqeshi othembelayo kubadlali abasebasha ngokweminyaka. Angikwazi nokho ukulwa ngimphoqe umqeqeshi ukuthi angikhumbule njalo ngoba ngihlale ngilimele. Ngeke kodwa ngiyeke ukusebenza kanzima njengoba ngihlale ngenza,” kusho uSikhakhane.
Ebuzwa ngamathuba okubhekana naleli qembu leNational First Division (NFD) uSikhakhane uxwayise ozakwabo ngobungozi bamaqembu adlala esigabeni esingezansi kwesikhulu.
“Nginethemba lokuthi ngizodlala ngoba ngiwumqemane. Ngiyazethemba futhi ukuthi uma ngilithola ijezi ngizomkhumbuza umqeqeshi ukuthi ngikhona. Angikaze ngizingabaze nangelilodwa ilanga ngakho-ke ngeke ngiqale namuhla. Ngeke ube lula umdlalo. Bazozibonakalisa ngoba badlala kwiNFD. Ngeke nangengozi sibathathe kancane ngoba uma sikwenza lokho sizobe sizidonsela amanzi ngomsele,” kuchaza uSikhakhane.
Lokhu kuphinde kwagcizelelwa ngumqeqeshi kaSikhakhane, uCavin Johnson kwazise enkundleni efanayo ngoFebhuwari lo mqeqeshi umince kwaze kwaba sekugcineni umdlalo uphela iqembu lakhe libambene ngo 2-2 noMthatha Bucks. Usuthu lwaze lwawunqoba sekukhahlelwa amaphenathi.
UJohnson utshele leli phephandaba ukuthi amaphutha abawenzile ngokuthambisa ngoba bezitshela ukuthi kuzoba lula ngenxa yesigaba seqembu ababebhekene nalo ngeke bawenze ngoba ngalokho bacishe bamelwa yizinhliziyo.
“Asikwazi ukuwuthatha kancane lo mdlalo ngoba usisondeza ephusheni lethu lokuyodlala e-Afrika. Siyiqembu elidala kunawo wonke ezweni ngakho-ke kusifanele ukumela izwe. Sifunde lukhulu kwiLast 32 sicishe sisala ngaphandle ngoba sithatha kancane isigaba okudlala kusona isitha sethu,” kusho uJohnson.