Ubalekela ukudidiswa eyeBucs uNdengane
AKAFUNI ukukufaka ekhanda ukuthi ufunwa yi-Orlando Pirates umdlali wasesiswini weBloemfontein Celtic, u-Alfred Ndengane, ongenye yezinsika zomqeqeshi uVeselin Jelusic.
UNdengane, obuye adlale maphakathi emuva, sekuvele kaningi ukuthi ucathanyelwa yiPirates eyakha kabusha iqembu. Ngaphambi kokuvala kwewindi lokusayinisa abadlali bekubukeka ezosayina kweZimnyama uNdengane kodwa kwagcina kungenzekanga, izikhulu zikhala ngokuthi azikwazi ukuhlakaza iqembu lonke phakathi nesizini.
ICeltic igcine ivume ukudedela uKabelo “Skipper” Mahlasela osekwiKaizer Chiefs, yona yaboleka uLorenzo Gordinho kuMakhosi.
“Ngiyayazi indaba yePirates kodwa okwamanje ngisewumdlali weCeltic. Kuyithuba elihle kuwona wonke umdlali ukuyodlala eqenjini elikhulu. Kodwa sengibe sebholeni isikhathi eside, izinto ezinjalo angizivumeli ukuthi zingiphazamise. Okusemqondweni wami wukudlalela iCeltic, siwine imidlalo,” kusho uNdengane.
Abadlali bePirates, bathi umqeqeshi wabo uMilutin Sredojevic ufuna abadlali abakwazi ukudlala izindawo ezehlukene ensimini. UThabo Matlaba uyena osheshe wathinteka kulokhu efakwa esiswini yize aziwa ngokuyibamba emuva.
Inkontileka kaNdengane neCeltic izophela ngo-2019. Kulindeleke ukuthi akhathule indima ebonakalayo uma iPhunya Selesele isibhekene neRichards Bay FC egijima kwiNational First Division (NFD) emdlalweni weLast 16 yeNedbank Cup eDr Molemela Stadium, eBloemfontein, ngeSonto ntambama.
“Kunzima. Ukube benginokuzikhethela bengizoqoka ukudlala neqembu elikwi-Absa Premiership. Kodwa akukho esingakushintsha manje. Sidlala neRichards Bay eyiqembu leNFD. Amaqembu eNFD anomdlandla omkhulu, asuke efuna ukuzibonakalisa ukuthi angcono kunawePremiership. Sizosebenzisa amava ethu nokuthi sidlalela ekhaya ngoba sinabalandeli. Akulula ukudlala eBloemfontein futhi bona njengeqembu leNFD bazokuzwa ukuthi akulula ukuza eBloemfontein ubuye ufumbethe,” kusho uNdengane.
Ukaputeni weRicharsbay, uMisho Mtebule, uthe: “ICeltic akulona iqembu elithusa kakhulu kodwa kuzoba nzima ngoba siya kuyona, nabalandeli bayo. Nokho uma ngibheka iqembu lethu ngiyabona ukuthi sizokwazi ukumelana nayo.”