Usazokwazi ukubuyela ekugijimeni osinde esahwa imilenze
USAZOKWAZI ukubuyela kwezemidlalo umgijimi waseThekwini osinde emadodeni abezama ukumshumpula imilenze ngesaha lokusika izihlahla, ukuhlinzwa kwakhe okube yimpumelelo ngoLwesithathu.
Odokotela abahlinze uMhlengi Gwala (27) amahora ayisihlanu esibhedlela esizimele, batshele umndeni ukuthi usazobuyela ekugijimeni yize kuzothatha isikhathi. Umngani wakhe uSandile Shange naye ongumgijimi, uthe bazijabule ngezindaba ezimnandi ngoba uGwala ubekhathazeke ngokuthi ngeke esakwazi ukugijima.
“Odokotela bathe konke kuhambe kahle kodwa kusazothatha isikhathi ukuthi imilenze iphole ngoba kuthinteke nemisipha. Okuhle wukuthi usazokwazi ukugijima nokushova ibhayisikili. Into yokuqala ayibuza odokotela esanda kungena esibhedlela wukuthi usazokwazi yini ukugijima. Ngisho kungathatha isikhathi ukuphola kwakhe siyajabula ukuthi uzobuyela ekugijimeni,” kuchaza uShange.
Uthe bazilolonga njalo entathakusa nomngani wakhe, olimale eyolanda yena. Uthe bebezilolongela iSA Champs ezoba ngoMashi 18 eBloemfonteni neHalf Iron Man engoJuni. Uthe umncintiswano wangoJuni ubuzokwenza ukuthi uGwala akwazi ukuncintisana ezingeni lomhlaba futhi ubesethubeni elihle.
UNksz Fundi Magwaza ongunina kaGwala uthe ugcine ukubonana naye ngoLwesithathu ebusuku esibhedlela.
“Simfice engakwazi nokukhuluma, wangakwazi nokusibona. Odokotela bathe ubesadakwe wumjovo namaphilisi emuva kokuhlinzwa. Siyathemba sizombona esengcono namuhla (izolo).”
Kushaye isikhathi sokuloba usaqhubeka umkhankaso wokunikelela uGwala izindleko zokumelapha, umnikelo obusifinyelele kuR400 000. Umkhankaso wokunikelela uGwala uvulwe ekhasini iBackaBuddy lapho kunikele khona ngisho abakwamanye amazwe. UMnuz Patrick Schofield oyisikhulu seBackaBuddy, uthe imali izokhokhela izindleko zokwelapha uGwala, athengelwe nebhayisikili elisha. Uveze ukuthi bangaphezu kuka-898 abakuleli nakwamanje amazwe asebenikelile abanye basathembisile.
Okhulumela amaphoyisa esifundazweni uCaptain Nqobile Gwala uthe kuphenywa icala lokuzama ukubulala emuva kokuba abasolwa abathathu behlasele lo mgijimi.