I-Sundowns ayisidle ngendlela efanele isicoco seligi
MHLELI: Ngimangazwa yindlela onondweba abasingatha ngayo imidlalo yeMamelodi Sundowns.
Emdlalweni weSundowns neFree State Stars kwaba nogcobho ngesikhathi unozinti weSundowns ebamba uNhlanhla Vilakazi izinyawo ebhokisini kodwa wakushaya indiva konke lokho owayephethe umdlalo.
Okwesibili umgadli weSuperSport u-Evans Rusike kwathiwa uyi-off side kabili kodwa engeyona neze nokwenza ukuthi iSundowns ithole iphuzu ngokungafanele. Kwesesithathu emdlalwewni wayo noSuthu kunamaphutha amaningi enzeka agcina edale ukuthi iSundowns ithole amaphuzu agcwele. Iphenathi kaPercy Tau yayingekho kodwa Usuthu lwangabekelwa eyalo. Igoli lesithathu leSundowns kwacacela noma ngubani ukuthi owalishaya wayesemhlabeni ongafanele.
Ngesikhathi idlala neChiefs kwadlaliswa kabi umdlali wamaKhosi kodwa lokho kwashaywa indiva yangabekwa iphenathi. Ukube yiChiefs noma yiBucs eyenzelelwa ngalolu hlobo ngabe uPitso Mosimane (osesithombeni) akathokozile ngezinqumo zonompempe.
Uma kuwukuthi iSundowns kumele idle isicoco seligi kumele isidle ngendlela efanele hhayi ngokuthi kube nentshontsho ngoba kuyacaca ukuthi kukhona abafumbathiswayo ukuze kuvinjwe iBucs neChiefs. Ukube kule midlalo yomithathu iSundowns ihluliwe ngabe eziMnyama ziqhwakele. Uma sebeshaywa onondweba bese kuthiwa abalandeli banochuku kanti bafuna ubulungiswa ngoba bakhokha imali ukuyobukela imidlalo. Thandazani “TT” Ngcobo KWAMAPHUMULO