Isimo seNFD sifana nesengane enganakwa umndeni wayo
UMA ekhaya kunendlu enkulu bese kuba nengane eyodwa okuthiwa ayihlale yodwa ngaphandle endlini encane (ebizwa nge-granny flat ngesilungu) ngicabanga ukuthi ingazibuza ukuthi ngabe ingeyalapho ekhaya ngempela yini?
Noma kungathiwa iyemukeleka uma sekudliwa ukuthi izodla nawo wonke umuntu kodwa ukuhlala yodwa endlini eseceleni abanye besendlini enkulu lapho kune-Dstv khona nayo yonke imfudumalo, kungayenza ihlale inemibuzo ngokuhlala yodwa. Empeleni ngubani ongeke ahlale ezibuza ukuthi kazi ubalulekile yini kuleli khaya uma yena ebekwa le kude kunabanye kodwa kungakaze kucaciswe ukuthi yena uhluke ngani kwamanye amalungu omndeni.
Empeleni ukuhlala kwigranny flat akuyona into embi kakhulu uma kungukuthi umuntu usekhulile futhi kucatshangelwa ukuthi kunezinto okumele azenze ngasese njengomuntu omdala. Phela uma kungumfana osemdala usuke esenokuvakashelwa yizintombi kanti ukuhlala kwigranny flat kungenza ukuthi angalokhu echaza izinto eziningi kubazali. Kodwa noma kunjalo kungakuhle ukuthi naye abe ne-Dstv, bese kuthi no-anti osizayo ake aye kule granny flat ayoqinisekisa ukuthi ihlanzekile njengoba kwenzeka endlini enkulu.
Ngiyazike ukuthi ziningi izizathu ezingenza ingane ethile ilahlelwe kwi-granny flat ngoba phela yonke imizi inezinto zayo okungelula ukuziqonda uma ungeyena owomndeni.
Ngikhuluma nge-granny flat nje, ave kuwukuthi ngiqonde ukuthunuka abazithola bekulesi simo ngoba ngiyazi bakhona. Isimo seNational First Division (NFD) ngisifanisa nesengane “enganakwa” evele ilahlelwe kwigranny flat kuthiwe ayizibonele ukuthi izokwenzenjani.
Ngokubona kwami iPremier Soccer Leage (PSL) ayinandaba nje neNFD yize kuyiligi okufanele engabe inakiwe njengoba kwenzeka e-England kwiChampionship yakhona.
Okokuqala nje kufanele engabe iNFD ayishodi ngabaxhasi njengoba intula kanje. Okwesibili kufanele engabe imidlalo yeNFD iyavela kwithelevishini ukuze kubonakale ikhono labadlali bayo okungangabazeki ukuthi liyindathane. Angiyibali-ke indaba yokuthi iNFD ayinayo neyodwa indebe yomkhumulajezi ekubeni kuyinto ebingaba lula nje ukuthola abaxhasi ukube imidlalo ibivezwa kwithelevishini.
Lokhu ngikubona kuyihlazo ngoba iNFD iyiligi yesibili eNingizimu Afrika okufanele engabe iyavutha bhe ukube inakwe ngendlela okufanele ngayo. Kusho ukuthini nje ukuthi iMultichoice Diski Challenge (MDC) isizoba nendebe yomkhumulajezi kodwa kucwebe iziziba kwiNFD? Lokhu kukhombisa ukuthi iPSL isabuka iNFD njengeligi lapho kufanele amaqembu ePremiership azitapele khona nje abadlali (ngoba basuke beshibhile) ukuze aqinise awawo.
Kufanele engabe yinto ekade yenzeka ukuthi imidlalo yeNFD ivezwe kwithelevishini ukuze kube lula ukuthola abaxhasi abangenza le ligi ibe sezingeni eliphezulu. Ngibona sengathi kwenziwa lokho kwenziwa ngamabomu ngoba angazi ngempela ukuthi ngingathi yini evimbile. Ukuqina kweNFD kungasho ukunyuka kwezinga nakwiPremiership. Akekho ongazi ukuthi abadlali bayalikhuphula izinga uma benolwazi lokuthi imidlalo yabo iyavela kwithelevishini lapho besuke bebukwa yizindimbane zabalandeli bakanobhutshuzwayo.
Ngiyazi ukuthi osihlalo bamaqembu ePremiership bayaba nomhlangano omkhulukazi nabeNFD kodwa lokhu ngikubona njengokwenzana izilima nje. Yini esuke ikhulunywa kulowo mhlangano uma isimo sisenje kwiNFD?
Angifuni nokuyiphatha indaba yemali etitilizwa kwiPremiership (lapho kunemiqhudelwano eminingi) kodwa amaqembu eNFD ebe edla imbuya ngothi. Ngike ngizwe nje nabadlali ukuthi basuke sebezilahla ngempela uma beyodlalela amaqembu eNFD besuka kwiPremiership ngoba bayazi ukuthi amaholo abo asuke ezoshintsha kakhulu. Akumele engabe sinesimo esinjalo uma sifuna ibhola laseNingizimu Afrika lithuthuke. Labo abanamava namagunya okwenza izinto zenzeke ebholeni laseNingizimu Afrika, bayazi ngaphakathi kubona ukuthi bangakwenza kalula nje ukushintsha izinto kwiNFD kodwa ukuthi abafuni. Bafuna siqhubeke nje isimo sokuthi bayachama bona ngenhla kwiPremiership, baphuze laba abangezansi kwiNFD.
Ungawuzwa umsindo ongasuka uma iMultichoice ingathi iqeda iMDC bese ifake imali kwiNFD iphinde isakaze yonke imidlalo yayo ukuze kube yiligi eqondile nevuthayo. I-PSL ingabona sengathi iphucwa into yayo futhi ngiyazi ukuthi isigungu sePSL ngeke nje sikuvume lokho ngoba bafuna iNFD ihlale iwuthuli lolu eyilona njengamanje.
Kimina iNFD ifana nengane okufanele ngabe ihlala endlini enkulu kodwa yathathwa yalahlelwa kwi-granny flat lapho ijikijelelwa khona lokho okuthandwa ukujikijelwa yiPSL kuyona. Akuthi diki nje kwiPSL ukuthi imidlalo yeNFD ayivezwa kwithelivishini okuyiyona into engenza abaxhasi beze belekenyana ngoba bazi ukuthi imikhiqizo yabo izobonwa yizwe lonke.
Ibuhlungu indaba yokubhuquza kwi-granny flat kweNFD ngoba igcina ibulele neqembu lesizwe iBafana Bafana. Liningi kakhulu ikhono kwiNFD kodwa lifihlwe ngokuthi le ligi inganakwa bese kuthi uma kukhona umdlali oshisayo athathwe amaqembu ePremiership asuke esemgabisele ngemali engcono.