IGagasi lizogubha nabalaleli kusasa
ISITESHI somsakazo iGagasi FM, sihlele ukugubha usuku lokuzalwa nabalaleli baso. Lo msakazo kusasa uzogubha iminyaka engu-12 waqala ukuzwakala emoyeni.
Lezi zindaba zidalulwe nguKhulekani Shandu okhulumela lo msakazo.
Uthe izinhlelo ezizwakala phakathi nezinsuku kusasa zonke zizosakazela ngaphandle.
“Iyona ndlela le yokukhombisa abalaleli bethu uthando futhi sibabonga ngoxhaso abasinikeze lona yonke le minyaka,” kusho uKhulekani.
Uthe uhlelo lwasekuseni olushayelwa uMzokoloko noNonjabulo Zwane luzobe lusakazelwa eMpangeni, eNgwelezane, kuthi olwethulwa uNomfundo Mzolo, iThe Golden Circle lusakazwe eMlaza, iMidday Shandis izobe isakazela endaweni yobumnandi i-Artizen, KwaMashu.
Uthe olwantambama olushayelwa uSphectacula noDJ Naves iThe Kings Drive izosakazela endaweni yobumnandi iThe Views, eThekwini.
Uhlelo lwezingxoxo olushayelwa ngu-Alex Mthiyane Indaba kulo msakazo, lube neminyaka eyisikhombisa nabalaleli balo ngoLwesihlanu ezindlini zalo msakazo, eMhlanga.
Kulo mcimbi bekukhona osopolitiki, abahlaziyi bezombusazwe nezikhulu zikahulumeni njengoba kuqoshwe uhlelo oluyisipesheli oluzozwakala kusasa ntambama.
Abahlaziyi okukhona kubo owayesebenza kwaSABC uNhlakanipho Zulu noLukhona Mnguni bakhulume ngezinto ezehlukene ezithinta izwe.
Kube sekuba nezingxoxo ezehlukene ezithinta ezombusazwe nodaba lomhlaba.
UBright Ntuli, ongomunye wabahluzi bezindaba ubonge bonke abantu ababambe iqhaza ekukhuliseni lolu hlelo selokhu lwaqala.