Kubulawe owe-ANC phambi komkakhe
SIKHULU isililo ngokubulawa kwevolontiya le-ANC laseMfume ebeligqugquzela ukuvota.
Kuthiwa uMnuz Nqobizwe Mkhize (46) waseSimahleni, eMfume uhlaselwe abalisa abangaziwa abathathu elele nomkakhe ezintatha kuzosa kube nguMgqibelo. Kuleya ndawo kuphinde kwabulawa abalisa ababili, uMnuz Sibonelo Hlongwane noMnuz Nathi Hlengwa abatholakale bedindilize emgwaqweni buqamama nalapho okuhlala khona uMkhize.
Kuthiwa laba balisa bangene batshela umkakhe okhulelwe ukuthi akamboze angababuki base bedubula uMkhize kaningana. Kuthiwa izinhlamvu ezintathu zingene ekhanda.
Okhulumela amaphoyisa uCaptain Nqobile Gwala uthe amaphoyisa aphenya amacala amathathu okubulala.
“Kukholakala ukuthi kuthe uma kugamanxa ihora lesibili ekuseni kwatheleka abasolwa abathathu abebehlome ngezibhamu, bakhahlela isicabha bangena kwaMkhize bamdubula. Udubuleke amahlandla amaningi kwesingenhla. Isizathu sokubulawa kwakhe asikaziwa,” kusho uCaptain Gwala.
Isigameko sesibili kukholakala ukuthi senzeke ngaphambi kwehora lesithathu lapho okuhlaselwe khona uHlongwane noHlengwa abadutshulwe abalisa abangaziwa abebehamba ngemoto. Lesi sigameko senzeke emuva kokubulawa kukaMkhize.
UCaptain Gwala uthe laba balisa bashonele endaweni yesigameko. Uthe isizathu sokubulawa kwabo asikaziwa.
Ikhansela lakuleya ndawo, uMnuz Ayanda Ndlovu, lichaze uMkhize njengomuntu obezinikele emsebenzini weqembu nasekusizeni umphakathi. Uthe nguye obenikwe umsebenzi wokugqugquzela abantu ukuthi babhalisele ukuvota.
“Ubengumuntu obethandwa kakhulu wumphakathi. Silahlekelwe njengeqembu nomphakathi ngoba ubezinikele futhi esebenzisa ngisho imali yakhe ukwenza imisebenzi yeqembu. Kubuhlungu kakhulu okwenzekile. Sishaqekile nangokubulawa kukaHlongwane noHlengwa abatholakale befile. Sinxusa noma ubani ongaba nolwazi ukuthi asebenzisane namaphoyisa ukuze kutholakale izigilamkhuba,” kusho uNdlovu.
UNdlovu uthe inkosikazi kaMkhize okulindeleke ukuthi ibelethe kule nyanga isesimeni esingesihle ngokomphefumulo ngenxa yokubulawa komyeni wayo ibhekile.
UMxhumanisi wekomiti lesikhashana le-ANC KwaZuluNatal Mnuz Sihle Zikalala uthe bashaqekile ngesigameko esenzeke kuleya ndawo. Uthe banethemba lokuthi amaphoyisa azosebenza kanzima ukuthola abathintakayo.
Izolo uNgqongqoshe wamaPhoyisa, uMnuz Bheki Cele uye kuleya ndawo eyokhuluma nomphakathi. UCele uthembise amalungu omphakathi ukuthi amaphoyisa azophenya ngesigameko sokubulawa kwalaba bobathathu. Uqhube wathi amaphoyisa azophenya nangamacala osekunesikhathi engaphothulwa. Elinye lalamacala uthe ngelokubulawa kowayengunozinti wePirates neqembu lesizwe, uSenzo Meyiwa, elisahlalise kabuhlungu izihlobo zakhe nomphakathi wonkana.
“Sicele umphakathi ukuthi usebenzisane namaphoyisa uphinde ubike amaphoyisa angenzi kahle kodwa uthi uwabika nawo ube ukhumbula ukuthi akhona amaphoyisa enza kahle nokufanele usebenzisane nawo,” kusho uCele.
Uthe uxoxe nenkosi yendawo wathola ukuthi lesi sigameko kungenzeka ukuthi asihlobene nezepolitiki.
Noma kunjalo uCele unxuse amaphoyisa ukuthi asebenze kanzima ukuthola abenzi bobubi ngisho kungathiwa abantu abaphezulu.