Abadlali beCeltic badube ukuzilolonga
BADUBE ukuzilolonga abadlali beBloemfontein Celtic ngoMgqibelo ekuseni ngoba besola izikhulu zeqembu ngokungabaholeli ngesikhathi.
Isolezwe lihabule lezi zindaba ngemithombo yalo ethembekile ukuthi abadlali bePhunya Sele Sele abazange bajime ngempelasonto.
“Abadlali beCeltic banqabile ukujima ngoMgqibelo ngaphambi komdlalo wabo neRichards Bay FC. Izikhulu zeqembu zabathembisa ukuthi zizobakhokhela imali ehambisana nombandela wokusayina inkontileka ngoLwesihlanu. Ngawo uLwesihlanu imali ayizange ingene, into enenge kakhulu abadlali. Bathathe isinqumo sokungajimi,” kusho umthombo othembekile.
ICeltic iyibambe endaweni yesishiyagalolunye kwi-log ye-Absa Premiership ngamaphuzu aw-29 emidlalweni ewu-23.
Umdlali ocele ukuthi igama lakhe lingadalulwa uqinisekisile ukuthi imali abebethenjiswe yona bayithole sekudlule isikhathi.
“Basithembisa ukuthi bazosinika imali yethu ehambisana nombandela wokusayina izinkontileka ngoLwesihlanu.
Nokho akuzange kwenzeke lokho njengoba kwakuhleliwe. Ngaleyo ndlela sithathe isinqumo sokuthi sivele singazilolongi ngoba kade sayilinda imali. Umholo ayikho inkinga ngawo, ungena ngesikhathi. Imali ebesiyikhalela yile yombandela wokusayina inkontileka. Iyona-ke esikhala ngayo kakhulu. Igcine ingenile ngoMgqibelo, into esijabulisile,” kusho umdlali.
Imizamo yokuthola izikhulu zeCeltic ayiphumelelanga. Ucingo lukaMax Tshabalala, usihlalo weqembu, belukhala kodwa lungabanjwa kanti elikaKhumbulani Khonco, oyisikhulu esiphezulu, belungangeni. Iphephandaba linaso isithombe sabadlali beCeltic beduba ukuzilolonga ngoMgqibelo ekuseni. Akusikona okokuqala abadlali beCeltic beduba ukujima, basanda kukhala ngokuthi bakhathele ngoba becikwa yindaba yokuzilolonga ngezimpelasonto ekubeni bengadlali.
Ekuqaleni kwesizini iCeltic bekubukeka ziyihambela kahle izinto njengoba ize yafinyelela kowamanqamu weTelkom Knockout lapho igilwe khona yiBidvest Wits, ePrincess Magogo Stadium, KwaMashu.