Bebefuna ayeke ukuthwasa umaskanda obulewe
UBESEYALELWE wumndeni wakhe ukuthi ayeke ukuthwasa umculi kamaskandi okwabashone kubulawa abahlanu ngoLwesithathu eNkandla.
Umndeni kaJubha ‘Skokela’ Goqo uthe Ubesewubikele ukuthi bake bahlaselwe emzini wakwaVilakazi lapho Ebethwasa khona. Umfowabo, uMnuz Bhekani Goqo, uthe umfowabo ubeqale ngoNovemba nyakenye ukuthwasa, okwenza wama kancane nasemculweni kamaskandi.
‘’Wangitshela esanda kufika ekuthwaseni ukuthi kushaywe elinye ithwasa behlaselwa wasindela ukuthi ubesanda kufika kwaVilakazi. Ubephatheke kabi ngendaba yokumataniswa nokweba. Ngamtshela ukuthi kungcono abuye ngoba kusho ukuthi abaphephile kodwa wanqaba,’’ kusho uGoqo. Uthe umfowabo bekulindeleke ukuthi aphothule ukuthwasa ngoJuni. Uveze ukuthi balungiselela ukumfihla ngeSonto khona eNkandla. Kulesi sigameko kucishe kwavalwa ngehlahla kwaVilakazi kubulawa uNkk Khulumile Vilakazi (76), Nksz Ntombiyenkosi Vilakazi (45) nendodakazi yakhe uSnenhlanhla (18), obefunda uGrade 11. Kwesinye isigodi saseZimbidla eNkandla ngoLwesithathu ebusuku kubulawe inyanga uMnuz Mfudumezeni Mhlongo (70). Kusolwa ukuthi lezi zigameko zihlobene njengoba zenzeke ngosuku olulodwa. UMnuz Thembinkosi Vilakazi uthe balungiselela ukungcwaba ngoMgqibelo. Okhulumela amaphoyisa KwaZulu-Natal uCaptain Nqobile Gwala, uthe kuphenywa amacala okubulala okungakaboshwa muntu ngawo. UNgqongqoshe wezokuThutha nokuPhepha koMphakathi eKZN uMnuz Mxolisi Kaunda, uthe amaphoyisa ngeke aphumule engakabatholi ababulali.