Zigwetshwe iminyaka izithandani ebezihushulisa izisu ngokungemthetho
ZIGWETSHWE iminyaka emihlanu umuntu ngamunye izithandani zaseThekwini ezazihushula abantu izisu ngokungemthetho.
Kuthiwa, u-Ahmed Katabazi (48) wase-Uganda nomkakhe, uBuyisiwe Vivian Sosibo (40) bagwetshwe yinkantolo yeMantshi yaseThekwini iminyaka emihlanu umuntu ngamunye ngoLwesihlanu olwedlule.
Kuthiwa babenesikhungo sokuhushula izisu esingekho emthethweni, kuDkt Pixley KaSeme (West Street).
Phambilini batholwa necala lokuba nebhizinisi lokuhushula izisu ngaphandle kwemvume. Kuthiwa bazibiza ngamagama ahlukene, kokunye babezibiza ngoDkt Solomon, uDkt Adam noma uDkt Ndawo.
Lezi zithandani zavuma ukuthi bezihushula izisu benika amakhasimende amaphilisi afakwa esithweni sangasese naphuzwayo. Inkantolo ithe uma eseqede isigwebo uKatabazi uzobuyiselwa kwelakubo.
UNgqongqoshe wezeMpilo KwaZuluNatal uDkt Sibongiseni Dhlomo usamukele isigwebo.
“SinguMnyango wezeMpilo KwaZuluNatal siyasamukela isigwebo esikhishwe yinkantolo kulaba ababili abebenza lo msebenzi onobugebengu,” kusho uDhlomo.
Lo mnyango ube nemikhankaso eyahlukene yokulwa nabahushula izisu ngokungekho emthethweni.
Kule mikhankaso kuvele ukuthi iTheku lihamba phambili ezibalweni zabantu besifazane abagcina benezinkinga ngenxa yokuzama ukuhushula izisu ngokungekho emthethweni.
Izibalo zakamuva zoMnyango zithi bangu-1101 abesifazane abazame ukushushula izisu baba nezinkinga. Abangu-69 kubona babe nezinkinga zesibeletho.
UDhlomo uthe babe nemikhankaso yokuxebula amaphepha anamathiselwe ezindongeni nasezigxotsheni akhangisa ngezinhlelo zokuhushula izisu eziphephile, nezishibhile nezenzeka ngokushesha. Lezi zikhangiso zibekwa abantu abahushula izisu ngokungekho emthethweni.
Uthe umuntu ovunyelwe ukuhushula isisu, oqeqeshiwe. Nalowo muntu akavumelekile ukukwenza emakhoneni.
UDhlomo uthe lesi sigwebo kufanele sithumele umyalezo kwabasakwenza lokhu nabacabanga ukukwenza.